Тыва ажыл берикчилери тускай мергежилдиглерни тускай сорулгалыг өөредири-биле «Россияның ажылы» порталынче билдириишкин киирер.
Март 1-ден эгелеп “Россияның ажылы” порталга дээди өөредилге программаларынга тускай сорулгалыг өөредилгеже билдириишкиннерни ажыл берикчилеринден хүлээп эгелээр. Бо чылдан эгелеп ол хевирге өөренир чагыг киргенде, бюджет акшазы-биле тускай мергежилге өөредир квотаны регионга бээр.
Тываның Баштыңы Владислав Ховалыг чагыгларны үезинде киирери дээш, боттарының угланыышкыннарында ажыл берикчилери-биле ажылдаар даалганы күүсекчи эрге-чагырганың шупту органнарынга болгаш тус чер бот-башкарылга черлеринге берген. Тускай сорулгалыг өөредилгеже чагыг киирер кампанияның харыысалгалыг албан чери кылдыр Республиканың Күш-ажыл болгаш социал политика яамызын томуйлаан.
Владислав Ховалыг чаа чүүлдү дыңнадып тура, 2030 чылга чедир республиканың бүдүрүлгелерин болгаш организацияларын мергежилдиг кадрлар-биле хандырар дизе, республиканың ажыл берикчилери тускай сорулгалыг өөредилгениң аргаларын боттуг ажыглаары чугула дээрзин айыткан. Кордакчылар-биле тускай сорулгалыг өөредилгениң керээлерин дүрген чарып эгелээр херек. Келир үеде тускай сорулгалыг өөредилгеже квота кампаниязының дээштии доозукчуларны бюджет олуттарынче хүлээп алыышкыны регионнуң контрольдуг сан-чурагайларындан хамааржыр апаар.
– Республиканың бүдүрүлгелерин болгаш организацияларын кадрлар-биле хандырар дизе, ажыл берикчилери дээди өөредилге программаларынга тускай өөредилгеже квота езугаар тускай мергежилдиглер белеткелиниң хемчеглерин чорудуп эгелээр ужурлуг – деп, Баштың чугаалаан.
Тускай кадрлар белеткелинге элээн сонуургалдыг даг-тывыш бүдүрүлгелери онза идепкейлиг болурун сагындырган.
Тываның Баштыңы регионнуң Экономиктиг хөгжүлде яамызынга “Россияның ажылы” порталга инвестиция компанияларының болгаш сайгарлыкчыларның 2026 өөредилге чылында дээди өөредилге программаларынга тускай сорулгалыг квотаже билдириишкиннерни апрель 1-ге чедир киирер ажылды организастаарын дааскан.
ТР-ниң Күш-ажыл яамызының дыңнатканы-биле алырга, Тывага казымал байлактар тывыжынга (3600 кижи), өөредилге адырынга (2120 кижи), кадык камгалалынга (2050 кижи), чырык энергия, газ болгаш бус, агаар үрдүрер хандырылгага (1023 кижи), тудуг адырынга (75), культура база спорт, дыштанылга организастаар адырга (706 кижи) мергежилдиг кадрлар хереглеттинип турар.
Күш-ажыл яамызы тускай сорулгалыг өөредилге чагыкчыларның хүлээлгелерин тодараткан:
- 2025 чылдың март 1-ге чедир «Россияның ажылы» порталга бүрүткедип, ОКВЭД, өнчүнүң хевирин, тускай өөредилге чагыкчызының категориязын айтыр;
- 2025 чылдың март 1-ден апрель 1-ге чедир «Россияның ажылы» порталче чагыгны киирип, 2026 чылда тускай сорулгалыг өөредилгеже квотазын айтыр.
