РФ-тиң Чазааның даргазы Михаил Мишустин аныяк көрүкчүлер болгаш ойнаарактар театрларының эде чаартылгазын база бүрүн септелгезин доозарынга акша-хөреңгини тускайлаар дугайында айтыышкынга атты салган. Ол сорулгага немелде акшаландырыышкын бээр 11 регионнуң санынче Тыва Республика кирген. Документиде көрдүнгени-биле алырга, республика ойнаарактар театрының эде чаартылгазынче 2024 чылда 230 сая рубльди алыр.
Тываның Баштыңы Владислав Ховалыг республиканың ойнаар-кыстар театрының оран-савазын чаартыр айтырыгны Россияның Культура яамызы-биле элээн үеде ажылдааш, чаартылга ажылдарының күрүне экспертизазынга төлевилел-санаашкын документилерин албан чери-биле дугуржуп алганын дыңнаткан. Регионнуң удуртукчузу чаартынган оран-саваже аныяк көрүкчүлер театрын көжүрүп киирер планныын медеглээн.
– Комплекс уругларга езулуг чогаадыкчы төп болу бээр. Ынчангаш чаартынган тудугже ойнаар-кыстар театрының бодундан өскеде, аныяк көрүкчүлер театры көжүп кирер – деп, Владислав Ховалыг бодунуң блогунда бижээн.
2013 чылда Тываның Чазаа Тываның күрүнениң ойнаар-кыстар театрын тургузар шиитпирни үндүрген. Ярославльдың база Москваның доозукчулары, ойнаар-кыстар башкарар мергежилдиг 13 артист бирги профессионал ойнаар-кыстар театрын үндезилеп тургусканнар. Театрның оюн көргүзүүн, бирги ээлчегде, бичии уруглар үнелеп, амгы үеде баар эң ынак чери болу берген.
Ойнаар-кыстар театры Виктор Көк-оол аттыг национал хөгжүм-шии театрының чогаадыкчы-бүдүрүлге мастерскаязында бактааттынып, амгы үениң негелделеринге дүүшпейн турар.
Амгы оран-савада сценаны интеллектуалдыг системалар-биле башкарар кылдыр эде чаартып, бедик технологиялыг аянныг театр комплекизи кылдыр эде тудар деп, ТР-ниң Культура яамызы сонуургаткан. Аңаа 200 кижини хары угда хүлээп алыр ийи көрүкчүлер залы турар. Театрның даштыкы овур-хевирин этниктиг ылгавыр демдектерлиг болурда, амгы үениң архитектуразы-биле сиилбээн ак-көк шилден ансамбль каастаар.
