«Россияның чылдың башкызы-2025» мөөрейниң тиилекчизи – Айдаш Хертек

Бөгүн, октябрь 5-те, бүгү делегейде Башкының хүнүн демдеглеп турар. Башкы – эң-не хүндүткелдиг болгаш буянныг мергежилдиг кижилерниң бирээзи.

Чоокта чаа Тывадан физика башкы Айдаш Хертек «Россияның чылдың башкызы-2025» бүгү-российжи мөөрейге тиилээн.

Тываның Баштыңы [id360104045|Владислав Ховалыг] Айдаш Хертектиң бүгү-российжи мөөрейге «Бойдус эртемнериниң өөредилгезин хөгжүдери дээш» деп номинацияга тиилекчи болганы регионга көскү чедиишкин дээрзин демдеглээн.

Санкт-Петербург хоорайга болуп эрткен «Чылдың башкызы-2025» бүгү-российжи мөөрейге Россияның шупту регионнарын төлээлеп келген 89 шылгараңгай башкы планнаттынган программа езугаар бодунуң эртеминге кичээлдерни эрттирген.

– Бойдус эртемнериниң өөредилгезин хөгжүдери дээш» деп номинацияда тиилээнимге дыка өөрүп тур мен. Мээң ынак эртемим физика болганда, ол угланыышкынны шилип алган мен. «Россияның чылдың башкызы-2025» бүгү-российжи деңнелдиг мөөрейге мээң кичээлимни болгаш мени үнелээнинге өөрүп тур мен – деп, башкы бодунуң чедиишкинин тайылбырлаан.

Бо чылдың сентябрь 1-де эжиктерин ажыткан Кызыл кожууннуң Каа-Хем суурда 3 дугаар чаа школаның физика башкызы болгаш директору Айдаш Хертек – «Чылдың башкызы-2025» мөөрейниң регионалдыг чадазынга тиилээнин сагындыраал. Ол дээди мергежил категориялыг болгаш чеди чыл стажтыг башкы.