Аныяктар өргээзинге Россияның Маадыры Найыр Кыргыс-биле ужуражылгага школачылар, сургуулдар, чазак-чагырга төлээлери, «Тываның маадырлары» кадрлар төлевилелиниң тиилекчилери, тускай шериг операциязының киржикчилери болгаш хоочуннары дээш өскелер-даа хөйү-биле чыглып, чаңгыс чер чурттуун диңмиттиг адыш часкаашкыны-биле уткуп алган.
Ужуражылганың хүндүлүг аалчылары – Россияның Маадырлары Буян Куулар, Чалым Чүлдүм-оол.
ТР-ниң Чазааның Даргазының оралакчызының хүлээлгезин күүседип турар Шолбан Сендаш тускай шериг операциязы эгелээнден бээр Тывадан «Алдын Сылдыс»-биле дөрт дайынчы шаңнатканын дыңнадып, оларның аразында бо хүннүң маадыры эң-не аныяа болуп турарын онзалап демдеглээн.
«Силерниң коргуш чок эрес-дидимиңер, быжыг туружуңар болгаш хүлээлгеңерге бердинген чорууңар эң-не ханы хүндүткелди болгаш магадалды болдурган. Россияның болгаш ооң хамаатыларының сонуургалдарын камгалап, хүлээлгеңерни алдарлыы-биле күүсеткен силер» – деп, Шолбан Сендаш чугаалаан.
ТР-ниң Дээди Хуралының Даргазы Кан-оол Даваа аныяк маадырга бүгү Тыва, бүгү Россия чоргаарланып турарын демдеглээн.
Школачылар болгаш сургуулдар Найыр Кыргыстың дайынчы даалгазын маадырлыг күүсеткениниң дугайында улуг кичээнгей-биле дыңнаан. Ол болуушкуннар Запорожьениң ийиги улуг хоорайы Гуляйполеже шавар халдаашкын үезинде болган.
Найыр Кыргыс хоорайже бир дугаар халдап киргеш, бодунуң эштеринден хоорлу берген. Командылал чериниң дужаалы езугаар камгалал турушту ээлеп алгаш, элээн каш дайзыннарны чок кылган. Аттырып алган будунда балыын боду шарааш, бүзээлелди үш хонук дургузунда тудуп келген. Чүү-даа болур болза, дириг артар-дыр деп шиитпирлээш, чанында бажыңче халып ора, база катап дайзын-биле дорт таваржы берген... Балыглангаш, шагзырап-шылаан дайынчы дедир аткаарлаар дугайында дужаалды алган соонда, 14 километр черни, дүжүп бербейн ээп келген.
Байга-Тайга кожууннуң Кызыл-Даг чурттуг аныяк маадыр бөмбүктүг хоккей ойнаарынга ынак. Ол Тываның бөмбүктүг хоккейге алды дакпыр чемпиону. Школачы чылдарында эң ынак кичээли – күш-культура.
Россияның Маадыры келир үеде планнары-биле үлешкен. Ол Тываның политехниктиг техникумун дооскаш, дээди өөредилге черинче кирер сорулгалыг. Найыр Кыргыстың күзели – Онза байдалдар яамызынга бараан болуру.
Ужуражылганың кол маадыры аныяк-өскенге эки өөренирин, спорт-биле өңнүктежирин чагаан. Оларның аразында ооң үежилери база хөй болган.
Чуруктарны Валерий Сандан тырттырган