Россияның «Шахтерлар алдары» хөрек демдээниң эдилекчизи Доржу Кара-Салдың 60 харлаан юбилейинге тураскааткан шыдыраа маргылдаазы.

Дүүн, май 3-те, Чадаана хоорайга Россияның энергетика яамызының Хүндүлүг бижии-биле шаңнаткан, «Шахтерлар алдары» хөрек демдээниң эдилекчизи Доржу Анандыевич Кара-Салдың 60 харлаанынга тураскааткан, 60 хардан өрү назынныг хоочуннар аразынга, республика чергелиг шыдыраа маргылдаазы болуп эрткен.

Хоочуннарның шыдыраа мөөрейинге Тываның чемпиону чораан Валерий Куулардан (Өвүр) эгелээш, ам бо хүнге чедир кожуун, хоорай, республика деңнелинде шыырак ойнап чоруур 25 шыдыраачы киришкен.

Швейцар система-биле 7 салыг иштинде болуп эрткен мөөрейге киржикчи-лерниң аразындан эң бедик рейтингилиг Мерген Анай-оол (Улуг-Хем) ийи хайым кылгаш, ап болгу дег 7 сандан 6 сан алгаш, тиилекчи болган.

Дараазында 2-4 дугаар шаңналдыг черлер алган шыдыраачыларны немелде көргүзүглер дузазы-биле тодарадыр ужурга таварышкан.Чүге дээрге, олар-ның алган саннары 5-5 кылдыр деңнежи берген. Түңнелинде Иван Күжүгет (Барыын-Хемчик) ийи дугаар черге төлептиг болган. Тиилекчи-биле оюнга ол удуун эрттирип алганы, салыг соонда сайгарылгадан илерээн.

Тиилелгеже кол кордакчы, шыдыраага спорт мастеринге кандидат Валерий Куулар Барыын-Хемчиктен Алексей Кара-Салга уттурупкаш, чемпион-биле хайымнааш, үшкү шаңналдыг черни ээлээн.
База бир Барыын-Хемчиктиң төлээзи, 80 харлыг хоочун шыдыраачы Чамыяң Быйымбаевич Ондар бо удаада дыка шыырак ойнааш, дөрт дугаар шаңнал-дыг черни чаалап алган.

Маргылдааны организастап эрттирген Доржу Анандыевичиниң өг-бүлези тускай шаңналдардан аңгыда, тиилекчилерни сески черге чедир шаңнаарын баш бурунгаар дыңнаткан турган. Ынчангаш шыдыраа хөлүнге чидиг деми-сел сөөлгү салыгга чедир үзүктелбээн.

База-ла немелде көргүзүглер дузазы-биле 4,5-4,5 саннар алган 4 ойнакчылар 5-тен 8-ке чедир шаңналдыг черлерни үлешкеннер. Олар дээрге, Анатолий Чанзан (Чөөн-Хемчик), Алексей Кара-Сал (Барыын-Хемчик), Степан Түлүш (Өвүр), Аян-оол Дүлүш (Чөөн-Хемчик) болганнар.
Маргылдааның эң улуг назылыг, 81 харлыг киржикчизи Даш-оол Кыстаевич Ондарны (Таңды) юбилярның өөнүң ишти Чечек Чүлдүмовна демдеглеп, тус-кай өртектиг белек-биле шаңнаан. Ол ышкаш Чөөн-Хемчиктен хоочун шы-дыраачы Дайын-оол Константинович Дуганчыны база тускай шаңнаан.

Юбилярның өг-бүлези маргылдааның киржикчилерин хүнзедир ашкарып-чемгербишаан, шыдыраа мөөрейин шииткекчилер Арат Ондар, Тимур Хова-лыг, Орлан Сарыглар-биле кады бедик деңнелге организастап эрттиргеннер.

Тиилекчиге кубокту, алдын медаль болгаш хүндүлүг бижик-биле катай ты-выскан. Улуг өртектиг белектер (майгын, чоорган) эдеринчи шаңнал болган. Мөңгүн, хүлер медальдарның эдилекчилерин болгаш 8-че кирген шыдыраа-чыларны база улуг өртектиг белектер-биле шаңнаан.
Бүгү Тывада ады билдингир, Тыва Республиканың алдарлыг ажылдакчызы, спорттун деткикчизи Владимир Кара-Монгуш эрткен шыдыраа мөөрейиниң алдын, мөңгүн, хүлер медальдарының эдилекчилеринге 10, 5, 3 муң акша шаңналдарын бодунуң арыг сеткилинден болгаш юбиляр дуңмазының алдар-ады дээш база тывыскан. Владимир Комбуй-оолович төлептиг шаңналдарлыг республика чергелиг улуг шыдыраа маргылдаазын эрттириксеп турарын иле-редирге, шыдыраачылар ону улуг өөрүшкү-биле хүлээп алганнар.

Улуг эрге-дужаал ээлээн дарга-бошка-даа эвес, Чадаананың 1 дугаар школа-зын 1981 чылда дооскаш, шериг албан-хүлээлгезин Венгрияга күүседип эрт-тиргеш, шериг соонда Черногорскиниң даг техникумунга 1984 чылда «чер өрүмнээр станоктуң машинизи» деп мергежилди чедип алгаш, Чадаананың хөмүр-даш уургайынга хүндүлүг дыштанылгаже үнгүже чедир чаңгыс черге ажылдап каан Доржу Кара-Салдың алдар-адынга тураскааткан шыдыраа мар-гылдаазы кандыг-даа республика чемпионаттарындан артык бедик деңнелге эрткен.

Бүгү назынында хөй-ниити ажылынга идепкейлиг киржип,аңгы-аңгы дең-нелдиң хол бөмбүү, баскетбол, шыдыраа маргылдаарынга киржип, шаңнал-дыг черлер ап чораан Доржу Анандыевич 2017 чылда Чадаанага «Мерзе» шыдыраа клувун тургусканы база солун. Ам ол шыдыраа клувунда респуб-лика чемпионаттарынга чедир улуг маргылдааларны үргүлчү эрттирип турар. Юбилярны Чөөн-Хемчик кожуун чагыргазының даргазы Алексей Түлүш 60 харлааны таварыштыр, кожуун мурнунга ачы-хавыязы дээш хүндүлүг бижик-биле шаңнаан .Ол ышкаш Өвүрнүң улуг эмчизи Валерий Куулар шыдыраачы эжинге савыя сапыктарны белекке сунган.

Өөнүң иштиниң бүзүрелдиг эжи, бир оолдуң, бир кыстың төлептиг адазы, 5 уйнуктарының ынак кырган-ачазы Доржу Анандыевич Кара-Сал ыщкаш Тываның төлептиг, чончу оолдары, кыстарында тыва чоннуң сүзүк-күжү тут-тунуп чоруур дизе черле частырыг болбас.

Мерген КЫРГЫС.