Россияның Социал фондузунуң Тывада салбырының медээзи-биле алырга, бо чылдан эгелеп тускай шериг операциязындан халашкан республиканың чурттакчылары Россия Федерациязының социал фондузунга хамааржыр төптерге реабилитацияны эртер эргелиг.
Реабилитация төвүнүң ажылдакчылары тускай шериг операциязының киржикчилеринге аарыглары болгаш кемдээшкиннериниң аайы-биле катап тургузуушкуннуң бот-тускай программазын ажылдап кылгаш, аңгы үделгени көргүзүп турар. Эмчиниң шинчээш, айытканы-биле санаторлуг эмнээшкинниң хуусаазы 21 хонук чедир уламчылаар.
«Россияның Социал фондузунуң регионалдыг салбырының тускай мергежилдиглери тускай шериг операциязының киржикчилеринге билдириишкин кииреринден эгелээш, эмнелге албан черлеринден документилер айтырарынга чедир, шупту чадаларда персоналдыг дузаны чедерир» – деп, Россияның Социал фондузунуң Тывада салбырының удуртукчузу Часкал Дараа чугаалаан.
Тускай шериг операциязының хоочуннары реабилитациялыг эмнээшкинче чорудар бижикти доктаамал чурттап турар черинден хамаарылга чокка Россияның Социал фондузунуң Тывада салбырынга азы чогуур дузаны көргүзүп турар эмнелге албан чери таварыштыр алыр.
Билдириишкининге санаторлуг-курорт эмнээшкини азы реабилитация херек дээрзин бадыткаан, ол ышкаш таарышпас көргүзүглер чогун бижээн эмчи документилерин кожар. Бир эвес хоочун кижиде ол документилер чок болза, Социал фонд салбыры албан черлер аразында кады ажылдажылга дамчыштыр эмнелге организацияларындан ону боттары чоруттуруп алыр.
Билдириишкин кирген хүнден эгелеп ийи ажыл хүнүнде ону сайгарып көргеш, хүлээп алганы шиитпирни билдириишкинде айыткан электроннуг почтазынче, азы Күрүне ачы-дузазының порталда хууда кабинединче, азы өске бир арга-биле билдириишкин киирикчизинге дыңнадыр.
Тускай шериг операциязының киржикчилеринге реабилитация ачы-дузазын болгаш санаторлуг-курорт эмнээшкининиң чедингирин бедидер дээш, реабилитация төвүнче аай-дедир орук чарыгдалдарын эгидип бээри көрдүнген. Компенсацияны алыр дизе, Россияның Социал фондузунуң Тывада салбырының клиент ачы-дуза албанынче орук чарыгдалдарын бадыткаан документилери-биле билдириишкинни киирер. Таксилээнинден аңгыда, кандыг-даа транспорт аймаанга – демир-орук, агаар, суг, автобус транспортунга азы хууда машиназы-биле чораанының чарыгдалдарынга компенсация көрдүнген.
Социал фондунуң удуртулгазынга хамааржыр реабилитация төптери Россия Федерациязының Маадырларын болгаш I бөлүктүң инвалидтерин оочур чокка дыштандырар эргелиг дээрзин демдеглезе чогуур.