Өрт айыыл-халавынга удур белеткелди күштелдирген

Улуг-Хем кожууннуң чагыргазының удуртулгазы өрт айыыл-халавынга удур белеткелди күштелдирген. Эрткен каш хонук дургузунда кожууннуң девискээринге сес өрт демдеглеттинген.

– Чурттакчылыг черлер, кыштагларны, чевег-хөөрлерни долгандыр өрттен камгалал кылдыр чардырар ажылды чорудары чугула. Суму, хоорайда быжыглаттынган "өртчүлер дружиналары" бүрүн белеткелдиг турар ужурлуг. Бичии-ле ыш көстүп үнүп келирге, хыналданы дораан чорудар, чогуур албан черлеринче дыңнадыр. Өртке удур тайылбыр ажылын чорудуп, хемчеглерни дарый чорудар – деп, кожуун чагыргазының даргазы Буян Балбак суму чагырга черлеринге дааскан.

Апрель ийиде Арыскан суурнуң чоогунда ховуга өрт өөскүп үнгеш, хөөрнү таварып эрткен. Ол ынчан элээн чевег өрттенген.

Хову-шөлдерде хар чедир эрип четтикпээнде безин өрттер эгелээн. Өрт айыыл-халавы хөй кезиинде кижилерниң харыысалга чогундан болур. Ынчангаш кижи бүрүзү онза харыысалгалыг болур ужурлуг.