Өрт медээчилерин хынаары-биле рейдилерни чорудар

Тываның Баштыңы Владислав Ховалыг республикада социал байдалы нарын өг-бүлелерниң бажыңнарында өрт медээчилерин хынаары-биле рейдилерни чорудар даалганы чогуур албан черлериниң мурнунга салган.

Россияның Онза байдалдар яамызының Тывада Кол эргелелиниң неделя санының илеткелинде одалга сезону эгелээни-биле бажың өрттериниң саны көвүдээнин дыңнаткан соонда, ук даалганы берген. Чүгле эрткен неделяда өртчүлер 29 катап үнүүшкүннерни кылган. Камгалакчыларның дыңнатканы-биле алырга, чыл эгезинден бээр Тывада 936 бажың өрттү болган, 2023 чылдың январь-октябрьга деңнээрге 52 эвээш. Айыыл-халаптан 11 кижи чок болган, 39 кижи когараан.

Тываның Баштыңы 2021 чылдан эгелеп ыш медээчизин халас салыр ажылдар эгелээнин, чылдан чылче өлүп-хораанының сан-чурагайы эвээжеп, ол эки түңнелдерлиг болганын сагындырган. Бо хүнге чедир муң ажыг өг-бүле, оларның хөй кезии хөй ажы-төлдүг өг-бүлелер, автономнуг өрт медээчилери-биле дериттинген.

Ынчалза-даа кандыг-даа дериг-херексел үрелип, азы ажылдаар байдалын чидирип болур. Ынчангаш одалга сезонунуң бүдүүзүнде программаның чаа киржикчилериниң бажыңнарынга медээчилерни эптеп салыры-биле чергелештир шагдагы херекселдерниң байдалын хынаар. Ажыглаар хуусаазы эрткеш үрелген медээчилерни солуур, чаа батарейлерни салыр.

Тываның Күш-ажыл болгаш социал камгалал яамызының, өг-бүлеге болгаш уругларга социал дуза төптериниң, хыналда-хайгаарал органнарының ажылдакчыларындан тургустунган ажылчын бөлүктер хыналданы чорудар. Суугулар болгаш чылыдар херекселдерни хөй ажыглаар одалга сезону эгелээни-биле, мындыг рейдилерни кварталда чаңгыс катап-даа болза чорудар болза эки деп, Владислав Ховалыг чугаалаан.

Россияның Онза байдалдар яамызының Тывада Кол эргелелиниң дыңнатканы-биле алырга, 2023 чылда Тывага 1108 бажың өрттү болган, оларның үштүң бир кезии чурттакчыларның оран-саваларга. Печка одаарының өртке удур айыыл чок чорук дүрүмнерин хажытканы, электри четкилеринде үрелиишкиннер, от-биле оваарымча чок чорук – өрттерниң кол чылдагааннары ында.