Сүт-Хөл, Чөөн-Хемчик, Бай-Тайга база Барыын-Хемчик кожууннарында арга-арыг өрттериниң уржуундан өртке удур онза чурумну кииргени-биле хамаатыларны арга-арыгже киирерин кызыгаарлаан.
Хүндүс чылып эгелээнден, чөпшээрел чокка кургаг сигенни өрттедип база хадып-сырыннап турарындан өрттүң өөскүп болур айыылы улгаткан. Ынчангаш өртке удур айыыл чок чоруктуң дүрүмнерин сагыыры чугула.
Кургаг сиген, бок аймаа өрттетпес, сереңгизин, таакпызын хынамчалыг өжүрер, одагның орнунче сугну кудуп, азы довуракты уруп, көстү өжүрер.
Өрттен когарал улуг: ыяш-даштар өрттенип, дириг амытаннар узуткаттынар болганда, “өрттен артпас” дээн угаадыгны сактып чорууру артык эвес.
Өрт өөскээнин эскерзиңерзе, кыдыындан тоомча чок эртпеңер. Тываның арга-арыг камгалалының диспетчер албанының дүн-хүн чок ажылдаар телефону: 8(39422) 5-04-86
Өртке удур айыыл чок чоруктуң чурумун хажытканы дээш, административтиг болгаш кеземче херээн онаап болурун сагындыраал.