Өрттенген кыштагларның таваан катап тургузар

Өвүр кожууннуң девискээринде ийи аал-коданга өрт халавы болганын кожууннуң чагырга даргазының хүлээлгезин күүседип турар Айдыс Куулар дыңнаткан.

– Солчур биле Дус-Даг сумуларының девискээринге болган өрттерге өршээл болуп, кижилер когараваан. Чурттаар оран-савазы, кажаа-хораазы өрттенген малчыннарывыс-биле деңге хараадап тур бис. Өрттенген кыштагларның таваан катап тургузар аргаларны өөренип көөр бис. Чайлаглап турар малчыннарывысты, оларның ажы-төлүн от-биле оваарымчалыг болурунче кыйгырдывыс – деп, Айдыс Куулар соцчеткилерде бижээн.

Республикада изиг агаар ам-даа каш хүн үргүлчүлээри-биле өрт айыылы улуг деп, Россияның Онза байдалдар яамызының Тывада Кол эргелели сагындырып турар. Июнь 10-га чедир республика девискээринге агаарның изии 35 чедип, ортумак температура нормадан 7 градус бедиир.

Июнь 21-ге чедир өртке удур онза чурумну киирген. Ол үеде одаг кыпсып, кургаг сиген болгаш бок өрттедири хоруглуг дээрзин сагындыраал.