Тываның Баштыңы Владислав Ховалыг 2026 чылда чер кырының өрттерин өжүрер талазы-биле хемчеглер планынга атты салган. Эрткен чылдан эгелеп, эрге-чагырга деңнелдериниң аразында бүрүн эргелерни аңгылаарынга дүүштүр, арга-арыг өрттерин санаваска, регионнар чер кырының өрттерин өжүрери дээш харыысалгалыг апарган.
Арга-арыг черлеринде өрт өжүрер эргени камгалал болгаш айыыл чок чорук албан черлеринге, онза камгалалдыг бойдус девискээрлеринге, чогуур федералдыг албан черлеринге хүлээдип берген.
Бо чаартылга арга-арыг фондузунуң черлеринден аңгыда, өртке удур демисежир чурумда кирбээн девискээрлерни алган. Ооң мурнунда шак бо айтырыг, чижээ, арга-арыглыг черлерге хамаарышпас хову азы чер кырының өрттеринге удур хөделип киреринге федералдыг болгаш регионалдыг албан черлериниң аразында дугуржулга чок чорукту тургузуп турган.
Тываның Баштыңының бадылааны планда өртке удур ажылды муниципалдыг азы регионалдыг байдалындан көрүп, онза байдалды болдурбас болгаш чайладырының чаңгыс аай күрүне системазының курлавырларын хаара тударының үш аңгы чадазын киирген.
Бирги чадада, өрт илереттинген соонда, муниципалдыг эрге-чагырга байдалды шинчилеп, өрттүң хемчээлин, чурттакчылыг черлерге азы арга-арыг фондузунга ооң айыылын, ону өжүреринге ажыглаар курлавырларның дугайында регионалдыг штабка илеткээр.
Бир эвес байдал нарыыдап эгелээр болза, хөделиишкинниң ийиги чадазын чорудар. Бо чадада өрт өжүрүп турар суурга азы хоорайга дузалажыр дээш, кожа-хелбээ чурттакчылыг суурларның күштерин болгаш аргаларын хаара тудар. Бир эвес өрт муниципалдыг кожууннарның кызыгаарларын эрте бээр болза, кожа чыдар кожууннарның курлавырларын ажыглаар.
Бир эвес өрт оон-даа хөрлээлээр болза, регион деңнелинге ажылдаар, ынчан онза байдалдарны болдурбас болгаш чайладарының республика системазының кезектерин бойдус өртү-биле демисежиринче хаара тудар.
Республика Баштыңының ол айтыышкыны чер кырының өрттерин өжүреринче хаара тудар күштерниң болгаш курлавырларның составы тодараттынган. Ниитизи-биле 1,1 муң ажыг кижини ынаар хаара тудары планнаттынган. Республикада апрель эгезинде эгелээр өрт айыылының сезонунга белеткел эгелээр болгаш өрт өжүрер ажылдарны организастаарынга харыысалгалыг кижилерниң аттарын документиде айыткан.