Сүт-хөлчүлер Хартыга мөгезинге чиик чычанны тывыскан

Бо чылгы Наадымның улуг хүрежинге күштүглерниң күштүү болуп, ийи мөгеге арткаш, үжүүрлешкеш «Тыва Республиканың Хартыга мөгези» деп хүндүлүг атка төлептиг болган Сүт-Хөл кожууннуң чоргааралы – Кайгал-оол Ондарның хей-адын бедидип, сүлдезин көдүрүп, мөгени алгап-мактаан байырлал болуп эрткенин чагырга чери дыңнаткан.

ТР-ниң Дээди Хуралының Даргазы Кан-Оол Даваа мөөрейлерниң бедик деңнелде эрткенин онзалап демдеглээн. Ол аныяк мөгеге база катап байыр чедирип, моон-даа соңгаар улуг-улуг чедиишкиннерни күзээн.

Хартыга мөгеге кожууннуң шупту ажыл-ишчи чонунуң, ырак-чоокта чурттап турар чаңгыс чер-чурттугларының болгаш чагырга чериниң өмүнээзинден «УАЗ Патриот» маркалыг автомашинаны тывыскан.

“Хартыганың найыры” байырлал таварыштыр тыва хүреш маргылдаазынга ТР-ниң Начын мөгези Бады-Маадыр Самдан шүглүп унген. База бир ТР-ниң Начын мөгези Артыш Монгуш үжүүрлешкен. Үшкү-дөрткү черлерде кожуун чергелиг Арзылаң мөге Мерген Монгуш база Моол күрүнеден аалчы Очур Нямсамбуу олар болганнар.