Сүт-Хөл кожууннуң мал эмчилери чайның изии-даа, кыштың соогу-даа дивейн мал-маган аарыгларын тодарадыр болгаш эмнээр талазы-биле ажылды план езугаар чорудуп, шудургу ажылдап турарын чагырга чери дыңнаткан.
Сүт-Хөлдүң ветеринария эргелели чылдан чылче эки түңнелдерни көргүзүп турар. Бо адырга хөй чылдарда ажылдаан, бедик арга-дуржулгалыг ажыл-ишчи удуртукчу Март-оол Монгуш ажылын билдилиг башкарып, коллективин эптиг-демнии-биле удуртуп чоруур.
Чоокта чаа кожууннуң тургустунганындан бээр 85 чыл оюнга база Наадым байырлалының үезинде Март-оол Монгушка «Сүт-Хөл кожууннуң көдээ ажыл-агыйының алдарлыг ажылдакчызы» деп хүндүлүг атты тывыскан.
Мал эмчилери Ишкин сумузунуң девискээринде аалдарга чедип, мал-маганның ханын алган. Бо хунннерде Алдан-Маадыр сумузунуң Манчүректиң Ак-Адырда чайлап турар көдээ ишчилерниң мал-маганынга халдавырлыг аарыглар: бруцеллез, лейкоз база ящурга удур камгалал тарылганы салырын дооскан. Улаштыр өске чайлагларда малчын коданнарже үнүүшкуннерни уламчылаар.
Малдың халдавырлыг аарыгларын кожуун девискээринге болдурбас дээш кызымаккай ажылдап чоруур мал эмчилеринге Ай-оол Донгак, Очур Сат, Думер Донгак, Ай-Суу Хертекова дээш өскелерни-даа хамаарыштырып болур.
Кожуун чагыргазы хүнден хүнче чемге ажыглап турарывыс эъттен болгаш сүттен кылган аъш-чемниң кадыкшылга айыыл чок чоруун хандырып, тыва чонувустуң шаг-шаандан тура үндезин ажыл-агыйы, чоргааралы болур – мал ажылының сайзыралынга улуг үлүг-хуузун киириштирип чоруур эрес-шудургу мал эмчилериниң чымыштыг ажыл-ижинге моон-даа соңгаар чедиишкиннерни күзээн.
