Сүт-Хөл кожууннуң көдээ ишчилери 6111 тонна мал чеми белеткээнин чагырга чери дыңнаткан. Сиген-ширбиилди кайы хирени белеткеп алганындан кышты онча-менди ажары хамааржыр.
Кожууннуң көдээ ажыл-агый эргелелиниң даргазы Шончалай Ондарның медеглээни-биле алырга, көдээ ишчилер август айның эгезинде мал чеминиң белеткелинче кирипкен. Сут -Хөлде сүүзүннүг хөй чылдыг тарымал сигенни ниитизи-биле 500 ажыг гектар хемчээлдиг черде тарааш, амгы уеде гектар черден ортумаа-биле 16-18 центнер сиген дүжүдүн ажаап ап турар.
Чайның ортаа айы чаъс-чайыктыг болганы-биле суггатыг шөлдерде сиген элбек өскен болгаш черден чайгаар үнген хову-шөлдерниң сигениниң ортумак хемчээли 25-30 сантиметр.
Кожуунда сиген кезилдезин аңгы-аңгы аргалар-биле (трактор-техника, хол кадыыры, амгы үенин сиген кезер мотоблок база мотокезикчи) кылып турар.
План езугаар 12864 тонна сигенни белеткээр ужурлуг. Амгы үеде салдынган планның 45-50 хуузун күүседип, 6111 тонна мал чеми белеткээн. Ажыл уламчылавышаан.
Мал чеминиң белеткели – харыысалгалыг үе. Күскү сиген ажылында көдээ ишчилер кожуглуг 27 тракторну, 200 ажыг хол кадыырларын ажыглап, бөлер, чүдүрер, сарааттаар ажылдарны чорудуп турар.
Бо хүннерде сиген кезилдези-биле чергелештир дүжүт ажаалдазы, тараа кезилдези база эгелээн.