Сүт-Хөлден Аңчы Монгуш Тываның тергиин дарганы болган

Эрткен неделяда Тыва үндезин культура төвүнге “Уран дарган” деп республика чергелиг ус-шеверлер мөөрейи болуп эрткен. Ук мөөрейге аңгы-аңгы кожууннардан ниитизи-биле 10 дарган киришкен.

Киржикчилер дузалакчызы-биле кыска үениң дургузунда аът дагазын шуткуп кылырынга мөөрейлешкеннер. Бир дарган чээни-биле, өскези өөреникчизи-биле, элээди назылыг оглу-биле-даа киржип турар дарган бар. Оларның аразында дузалакчы чок, чааскаан киржип келген кижилер база бар.

Мөөрейниң түңнелдери:
Үшкү шаңналдыг черни Улуг-Хем кожуундан келген дарган Эдуард Балчий алган. Ийиги шаңналдыг черге Таңды кожууннуң дарганы Якир Ондар төлептиг болган. Бирги черни Сүт-Хөл кожууннуң салым-чаяанныг дарганы Аңчы Монгуш бүзүрелдии-биле чаалап алган.

Тускай шаңналдар:
“Хоочун дарган” деп тускай шаңналга Сүмбүр Доңгакович Сандан, “Үлегерлиг дарган” деп шаңналга Виктор Ондар, “Келир үениң дарганы” деп тускай шаңналга Эртине Ооржак болгаш ооң оглу тус-тузунда төлептиг болганнар.

Мөөрей-биле чергелештир Тыва Республиканың Улустуң усчузу Кенин Күдүш-оолович Саттың 55 харлаан оюнга болгаш ооң чогаадыкчы ажыл-ижинге тураскааткан делгелгеге дарганның эш-өөрү, эгин кожа ажылдап чоруур коллегалары, мөгейикчилери болгаш ус-шеверлер чыглып келгеннер. Делгелгени Тываның культура сайыды Виктор Чигжит биле юбиляр Кенин Сат ажытканнар.

Дарганнарны деткип, республика чергелиг “Уран дарган” деп ус-шеверлер мөөрейин эрттиреринге улуг үлүг-хуузун дараазында эш-өөр кииргеннер: Дииңмей Балбан-оол, Геннадий Куулар, Дайынчы Ондар, Чапсай Дугар-оол, Оскал-оол Кысыгбай, Байбек Монгуш, Алик Монгуш, Чойган Монгуш, Евгений Ооржак, Валерий Ооржак, Валентин Ендан.

Тыва үндезин культура төвүнүң медээзинден

Тыва үндезин культура төвүнүң чуруктары