Национал байырлал – Шагаа бүдүүзүнде Тываның кадеттер корпузунуң кижизиттирикчилеринге Кадык камгалал яамызының штаттан дашкаар диетологу Анджела Канчыыр-оол школа-интернаттың директору Сылдыс Монгуш-биле тыва далганның ажыктыг шынарларының дугайында тайылбырлап, сүүзүннүг чем кылыр мастер-классты эрттирген.
Эмчилерниң санап турары-биле, чарбалай тырткан тараадан тыва далган хан-дамыр, хан, ижин-шөйүндү, чүстер болгаш кеш аарыгларын болдурбазынга ажыктыг.
Тыва далганның чаңчылчаан аргазы – арбай биле ак-тарааны хооргаш, хоюдур дээрбелээш, дустуг тыва сүттүг шайга азы анаа сүтке холааш, өреме биле саржагны амдан киир холуур. Улам чаагай амдан киирер деп бодаар болза, кат-чимис, ары чигири болгаш оон-даа өске чигирзиг чүүлдерни холуп болур.
Тыва далгандан чаагай амданныг борбакчыгаштарны кылыры, чем кылырынга болгаш хостуг үени эки эрттирериниң арга-мергежилин экижидеринге тергиин арга болган.
Хемчег «Сделаем вместе!» деп бүгү-российжи шимчээшкинниң «Школага болгаш бажыңга кадык чемненилге» деп төлевилелдиң чорудуу-биле, ол ышкаш тускай шериг операциязында киржип турар шеригжилерге деткимче кылдыр эртип турар.
Национал чем кылыр мастер-классты ТР-ниң Дээди Хуралының депутады Елена Ховалыг, ТР-ниң өөредилге сайыдының бирги оралакчызы Орлан Соян база Тывада уругларның эрге-ажыын камгалаар бүрүн эргелиг төлээзи Сайзана Товуу олар барып көрген.
Уругларның тыва далгандан белеткээни чаагай болгаш ажыктыг «борбакчыгаштарын» дайынчы хөделиишкиннер девискээринде шеригжилерге Шагааның сөңү кылдыр дамчыдар.
