Сааяларның амыдыралында өөрүшкүлүг болуушкун – чурттаар чериниң айтырыы шиитпирлеттинген

Тываның Баштыңы Владислав Ховалыгның даалгазы-биле Сааяларның өг-бүлезинге чаа квартираның дүлгүүрлерин тывыскан. Нина Саая база ооң уйнуу Айзаның амыдыралында өөрүшкүлүг болуушкун болган – элээн каш чылдар иштинде түр чуртталга шөлдүг турган кырган-авашкыларның Кызылга чурттаар чериниң айтырыы шиитпирлеттинген.

Тываның Баштыңының даалгазының соонда, өскүс дээш ээлчегде турар Айзага бажың бээрин дүргедеткен.

Айза – Ыраккы Чөөн чүк университединиң чурттар аразының харылзаа факультединиң бирги курузунда өөренип турар. Үрде манааны бо болуушкун дээш, ол албан-биле Владивостоктан ужуп келген. ТР-ниң Чазак Даргазының оралакчызы Орлан Сарыглардан чаа оран-саваның дүлгүүрүн алгаш, карааның чажын чодуп турган Нина Ендан-Сюрюновнаны кужактап каан.

Кырган-ава бо чылдар дургузунда уйнуу-биле ийилдирзин деткип чораан кижилерге четтиргенин илередип шаг болган. Чырык, чылыг, чаа квартирага кайызы-даа дыка таарзынган.

– Айза өөредилгезин доозуптарга база катап ужуражы бээр бис. Тускай эртемниг аныяк мергежилдиглер биске херек. Тываже чанып келирин манап, херек апарза, ажылга тургустунарынга дузалажыр бис – деп, Орлан Сарыглар Тываның Баштыңының адындан Айзага боду бажыңныг болганы дээш, байырны чедирген.

Айза бажыңының дүлгүүрлерин алгаш, өөренип турар черинче аъттаныпкан. Нина Ендан-Сюрюновна амдыызында чааскаан аңаа чурттап артып каар. Айза үе-шаанда коммунал ачы-дуза чедирилгелерин төлеп турарын кырган-авазынга чагаан.

Өөредилгезин доозупкаш, Кызылга чанып келгеш, өг-бүлезиниң уязын шимеп эгелээр бодалдыг. Квартиразынга бир дугаарында чүнү салыксап турарын айтырарга, бодангаш, номнарлыг боолук деп, харыылаан.

Владивосток хоорайга, өөренип турар черинге дыка таарзынган – тергиин демдектерлиг студент япон дылды шиңгээдип, англи дылын сайзыраңгайжыдып турар, Японияга чедер күзелдиг. Айзаның амыдыралчы планнары хөй, ам төрээн черинде идегелдиг тылы бар.