Тываның В. Көк-оол аттыг национал хөгжүм-шии театрынга Барыын-Хемчик кожууннуң Саая Хураган-оол аттыг хөгжүм-шии театрының артистери "Сай-Суу кадын" база "Чудурук ийи" деп шиилерни уран чүүлге хандыкшылдыг чонга бараалгадып көргүскен.
Ук шиилерни ТР-ниң уран чүүлүнүң алдарлыг ажылдакчызы, режиссёр Альберт Хомушку тургускан. Ол ышкаш Барыын-Хемчик кожууннуң ус-шеверлериниң, чурукчуларының ажылдары театрның фойезинге делгеттинген.
ТР-ниң Чурукчулар эвилелиниң кежигүнү, ус-шевер Карим Монгулбии, база аныяк чурукчулар Аржаан Ооржак, Саин Күжүгет, Меңги Доңгак боттарының уран чүүлчү үүжезин бузуп, чураан, кылган ажылдары-биле көрүкчүлерниң сонуургалын чаалап алганнар.
Саая Хураган-оол аттыг хөгжүм-шии театрының режиссеру чораан, уран чүүл болгаш культураның тергиини Хураган-оол Серинович Сааяның дугайында делгелгени Байлак Хомушку белеткээн.
Аянгаты сумузунуң культура одааның ажыл-ишчилери Хүн ноянывыс Буян-Бадыргы Монгуштуң чаа тураскаалының план-македин чонга таныштырган.
Барыын-хемчикчилерниң бараалгадып көргүскен шиилери-даа, делгелгелери-даа көрүкчүлерниң сеткилин уран чүүлчү кужурун хандырып, онза солун байдалга эрткен.
