«Сайлык» лагериниң бирги ээлчээ доозулган

Тываның девискээринде уругларның чайгы дыштанылгазы уламчылавышаан. Чайгы лагерьлерниң ийиги ээлчээ уругларны хүлээп ап эгелээн. Тываның өөредилге сайыды Елена Хардикова Тес-Хем кожууннуң «Сайлык» лагеринче ажылчын үнүүшкүн аайы-биле четкенин яамы дыңнаткан.

– «Сайлык» лагеринде бирги смена доозулган, аңаа 60 уруг дыштанган. Дыштанылга чери тайганың арыг агаарлыг, кайгамчыктыг чараш бойдус-чурумалдыг черинде турар. Оолдар болгаш уруглар чайгы дыштанылгазының дугайында чүгле өөрүшкү-маңнай-биле чугааладылар. Оларга солун үени аныяк, чогаадыкчы тускай мергежилдиглер болгаш студентилер организастаан. Ук лагерьге чүгле кожуундан эвес, а өске-даа хоорай-суурлардан, харын-даа Тывадан өске регионнарда чурттап турар уруглар кээп дыштанган. Лагерьниң ам-даа сайзыраарынга арга-шинек бар. Келир чылын майгын лагерин организастаары көрдүнген – деп, сайыт дыңнаткан.

Ол ышкаш уругларның кадыкшылга болгаш дыштанылга черлерин чаартыры федералдыг программа езугаар лагерьниң эмнелге болгаш аъш-чем блогун келир чылын чаартырын сайыт медеглээн.