ТР-ниң Дээди Хуралының хораа даргазы Эрес Хуурак дайынчы хөделиишкиннер девискээринде Салаан Тюлюш дуңмазы Чаян-биле чаңгыс чер чурттугларынга дуза чедирер организацияны тургусканын дыңнаткан.
– Донецк болгаш Луганск Улус Республикаларның девискээринче ажылчын чоруувус үезинде чаңгыс чер чурттугларывыстың чүгле дайын шɵлүнде эвес, а фронт чанында шугумда база дыка хɵй ажык-дузалыг ажылды кылып, бот-боттарынга дузалажып турарын база катап кɵрдүвүс.
Оларның бирээзи – Салаан Тюлюш. Ол каракка кɵскү эвес-даа болза, аажок херек ажылдарны кылып турар. Каш чылдар дургузунда Салаан читкен дайынчыларны дилээринге дузалажып, шеригжилеривиске болгаш оларның өг-бүлелеринге юридиктиг сүмелерни берип, янзы-бүрү айтырыгларны шиитпирлежип турар.
Бо ажылды эки тура-биле эгелээш, амгы үеде Донецк Улус Республиканың истелге органнары-биле албан езузу-биле ажылдап турар.
Дуңмазы Чаян-биле дайынчыларга болгаш оларның өг-бүлелеринге дуза чедирер «Донецк-17» деп организацияны тургускаш, Тывадан фронтуже чорудуп турар кезек автомашиналарының документилерин база белеткеп кылып турарлар.
Оларның ажылы бистиң дайынчыларывыска дорт болгаш тодаргай деткимче-дир. Алышкыларга сеткилимниң ханызындан четтиргеним илередип, чедиишкиннерни күзедим!
