Салым-чаяанныг композитор Вячеслав Тановтуң 65 харлаанынга

Россия Федерациязының болгаш Тыва Республиканың культуразының алдарлыг ажылдакчызы, салым-чаяанныг композитор, башкы Вячеслав Тановтуң дугайында Тываның А. С. Пушкин аттыг национал ном саңы белеткээн.

Сураглыг композитор, ыры башкызы Альберт Седип-оолович Тановтуң база тыва литератураның сайзыралынга чогаадыкчы улуг үлүг-хуузун киирген, онзагай үннүг херээжен чогаалчы Екатерина Танованың өг-бүлезинге Кызыл хоорайга төрүттүнген.

Кызылдың 3 дугаар школазын, уран чүүл школазының скрипка клазын дооскан. Кызылдың уран чүүл училищезиниң үрер-хөгжүм салбырын чедиишкинниг дооскаш, ол-ла чылын Р. Кенденбиль аттыг уругларның ниити билигниң болгаш уран чүүлдүң школа-интернадынга ыры-хөгжүм кичээлин башкылаары-биле кирип алган.

Вячеслав Альбертовичиниң өөреткен сургуулдары кожууннарның аңгы-аңгы булуңнарында культура килдистеринде, школаларда үре-түңнелдиг ажылдап чоруурлар. Ажылдап турган үелеринде ыры башкыларынга, уран чүүл школаларынга кичээлдерге ажыглаары-биле методиктиг сүме-дискилерни чогаадып, нептередип үндүргүлээн. Ол республика чергелиг композиторлар аразынга «авторлуг ырылар» мөөрейлеринге бо-ла киржир турган, түңнелинде кандыг-ла бир дээди шаңналга төлептиг болур.

Тыва дугайында эң дээре ыры мөөрейинге Дээди шаңналды алган. Вячеслав Танов хөй киржикчилиг танцы-самның ыры-хөгжүмүнге тааржыр аялгалар чогаадып бижиир бойдустан салым-чаяанныг хөгжүмчү.

Школачылар аразында өзүп орар салгалдың уран чүүлге сонуургалын оттуруп, ырлаар салым-чаяанын ажыдары-биле чылдың-на республика чергелиг эрттип турар «Хамнаарак» мөөрейинге уругларның сеткил-сагыжынга тааржыры-биле шилип ап турар хөй-ле ырыларның автору. Оларның аразындан эң-не билдингир уругларның ырлажыр ынак ырылары: «Бора-Шээлей», «Ачамга», «Артыш», «Сылдыстарның кадарчызы» база чонда дүргени-биле тараан ырылар: «Чалыы Тывам, чечектел-ле!», «Чаңгыс дуруяа», «Чедип алдынмас сылдыс», «Кудалар» дээш, оон-даа өске.