Самбажык Сандак – уран чүүлге болгаш чогаалга сундулуг аныяк кижи

Республика чергелиг "Аныяк шүлүкчү" мөөрейиниң 18-23 харлыглар аразынга бирги черни Самбажык Сандак чаалап алганын ТР-ниң Чогаалчылар эвилели дыңнаткан. Ол Кызыл хоорайга төрүттүнген. Мөңгүн-Тайга кожууннуң Мугур-Аксы суурунга элээди, школачы үелерин эрттирген.

Аныяк шүлүкчү школаны дооскаш-ла, Кызылдың башкы колледжизинче тыва хөгжүм, хөөмей-сыгыт башкызы мергежилин чедип алыры-биле өөренип кирген. Уран чүүлге өөредип чораан башкылары Чодураа Тумат, Хеймер-оол Ховалыг.

Тываның күрүне университединге тыва дыл болгаш англи дыл салбырынга өөренип тура, Тываның Улустуң чогаалчызы Мария Күжүгеттиң удуртуп турары "Сорунза" чечен чогаал каттыжыышкынынче барып эгелээш, шүлүк делегейинче шымнып кирген.

Шүлүк болгаш чогаалдың өске хевирлериниң чажыттарын башкызы Мария Күжүгет айтып берип, деткип чоруур. Амгы үеде Саха (Якут) Республиканың Арктиктиг күрүне институдунуң театр болгаш кино актеру кылдыр өөренип чоруур. Алыс черле угундан уран чүүлге болгаш чогаалга сундулуг кижи.

Ачамга чагаа

Хензиг чаштан ачайым сээң ынакшылың
Херечизин көрбээним шын. Чорупкан сен.
Эргим сөзүң, чагыг-сүмең, деткимчеңни
Эргий хүлээп четтикпээним ужуру чүл?

Чалар от дег авайымның ынакшылы
Сеткилимни чымчак кылдыр кижизидип,
Сезиг чокка арат-чоннуң аразынче
Чаңгыс чалгын кыстып бергеш ужудупту.

Сеткилимниң уянынга алзып алгаш
Чамдыктарда түрегделди көөр-ле-дир мен.
Частып үнер, ок дег дүрген, дидим чаңны
Сенден көрүп, дуржулганы алырым кай?

Чаялгалыг чуртталгамны сөңнеп бергеш,
Чалгынымны ол-ла олчаан эжештирбээн.
Чүгле саарзык чалгын-биле бедиктерже
Чүткүдерге хөй күш үнер, берге-ле-дир.

Хостуг эргээ чуртталгаңга көстүп келгеш
Хорадаар-даа, хомудаар-даа бодалым чок,
Салым-чолду, бүтпейн барган ынакшылды
Сагыш-чүрээм буруудадып, хөлзевес-даа.

Шыгаалдарым, күзел-соруум чогум быжыг,
Дүжүп берип шыдавас мен. Оруум узун.
«Шыдаар мен!» – дээш чалгынымны бодум септээш.
Дүдүскектиг тайгаларже ужугуптайн!