Самбо мөгелеринге чаа спорт залын ажыдар

Тываның Баштыңы Владислав Ховалыг самбога делегейниң чемпиону Саян Хертек-биле ужурашкан.

– Тыва сураглыг спортчулары-биле алдаржаан, оларның бирээзи – Саян Хертек. Амгы үеде ол Москвада чурттап турар, ынчалза-даа төрээн черин черле утпайн чоруур. Ооң төрээн республиказынга спортту, ылаңгыя самбону сайзырадыр дээн саналын деткидим.

Тываның Спорт яамызы чүгле самбо мөгелеринге чаа спорт залын белеткеп турар. Уругларны өөредир тренеривис база бар-дыр. Саян – Россияның алдарлыг спорт мастери, самбога Россияның чеди дакпыр чемпиону, делегей кубогунуң эдилекчизи, самбога делегейниң чемпиону. Бо хүннерде ол республиканың аңгы-аңгы булуңнарынга чедип, оолдар, уругларга мастер-классты эрттирер. Алдарлыг спортчуну олар четтикпейн манап турар.

Мени бистиң спортчуларывыстың биче сеткилдии магададып турар. Сээң мурнуңда делегей чергелиг кижи олурар, ынчалза-даа чугаалажы бээриңге – эмин эрттир биче сеткилдиг. Эң-не кол чүүл – кижи болуп артары. Алдарлыг чаңгыс чер-чурттуувустуң эгелээшкинин деткиир бис – деп, Владислав Ховалыг социал четкилерде бодунуң арынында бижээн.

Кара-Хөлдүң төлептиг оглунга чаа өгнү берген

Кара-Хөл сумузунга төрүттүнген самбога делегейниң чемпиону Саян Хертек төрээн чери – Бай-Тайга кожуунче аалдап четкен. Кожууннуң Николай Өлзей-оол аттыг культура бажыңынга алдарлыг чаңгыс чер-чурттуу-биле ужуражылга болуп эрткен. Бай-тайгажылар Саян Хертекке чаа өгнү белекке берген.

Хемчик школазының өөреникчилери болгаш кожууннуң самбо секциязының спортчулары Бай-Тайганың төлептиг оглун хүндүткеп байырлаар езулалынга киришкен. Олар сцена кырынга самбо аргаларын болгаш арга-дуржулгазын көргүскен. Делегей чемпиону-биле ужуражылга соонда, спортчулар тураскаал кылдыр тырттыржып алганнар.

Ай бурунгаар Россияныӊ самбога чемпионады Свердловск областыӊ Верхняя Пышма хоорайда болуп эрткен. Аңаа Саян Хертек – Россияның чеди дакпыр чемпиону болганын саныдыраалы.