Саргы энцефалидинге удур тарыдып алырын эмчилер сүмелеп турар

Росхереглелхайгааралдың Тывада эргелелиниң медээзи-биле алырга, саргыга ызырткан улустуң саны көвүдеп турар.

Тыва халдавырлыг энцефалит саргызынга ызыртып болур айыылы улуг регионнарның даңзызынче кирип турар.

Халдавырлыг энцефалит чүнүң-даа мурнунда төп нерв системазын үрээр. Аарыгның чедирип болур уржуктары: каң кадык болуп экирииринден бертик-межел болдурарынга, харын-даа өлүмге чедирер кадыкшылдың кемдээшкиннери-дир.

Аарыгның им-демдектери кандыг болурул?

Бо бо аарыг чазын-күзүн саргының эң идепкейжип турар үезинге кол нуруузунда хамааржыр. Инкубация (чажыт) үези нургулайында 10-14 хонукта үргүлчүлээр, чамдыкта ол 1-ден 60 хонук суг болгулаар.

Аарыг соок дер дүжүп дидиредир, хөлчок баш аартыр, эът изидер (38-39 градус чедир), куску келдирер, кустурар им-демдектен эгелээр. Шыңганнар аартыр, сөөк-даяк ыстадыр болур. Аарыг кижиниң арын-шырайы мычык-кызыл апарып, чоорту ук байдал белче дамчыыр.

Кым ону халдадып ап болурул?

Саргы энцефалидиниң халдавырынга бүгү улус таваржып болур.
Ажыл-ижи үргүлчү арга-арыг кезип чоруур кижилер – арга-арыг ажыл-агыйының, геология-шинчилел партияларының, электри дамчыдар шугумнарның ажылдакчылары, топографтар, аңчылар, туристер халдавырга эң таваржып болур. Хоорайжылар хоорай чоогунда аргаларга, сесерликтерге, сад-огород участоктарынга энцефалиттиг саргыга ызыртып болур.

Халдавырлыг энцефалиттен канчаар камгаланып болурул?

Саргылар көвүдээн үеде кижи бүрүзү идик-хевин болгаш мага-бодун боттуң азы өске кижиниң дузазы-биле өйлеп-өйлеп хынаары чугула, а илереттинген саргыларны доп-дораан уштур.

Саргы энцефалидинге удур тарылганы кайда кылып турарыл?

Халдавырлыг энцефалитке удур тарылганы чурттап турар чериниң аайы-биле Кызыл хоорайның поликлиникаларында, төп кожуун эмнелгелеринде, кожууннар аразының эмнелге төптеринде кылып турар.

Росхереглелхайгаарал саргыга ызыртыр таварылгадан баш бурунгаар камгаланырыныӊ дугайында тайылбырлаан. А кижиниң иммунитединиң күш-шыдалын быжыглап, саргы энцефалидинге удур тарыдып алырын эмчилер сүмелеп турар.

Айыылдыг девискээрже киреринге чедир ийи неделяның дургузунда халдавырлыг энцефалитке удур тарылганың долу курузун дооскан турары чугула дээрзин база катап сагындырып каалы.