Сарлыкчыларга эрте пенсияже үнер эрге

Мөңгүн-Тайга кожууннуң Мөген-Бүрен сумузунда «Тайга черим чараш малы» деп республика чергелиг сарлык болгаш сарлыкчылар байырлалынга хамаарыштыр ТР-ниң көдээ ажыл-агый сайыды Сергей Ондар бодалы-биле үлешкен.

– Тывада сарлыкты Мөңгүн-Тайга, Бай-Тайга, Өвүр болгаш Тере-Хөл кожууннарның девискээрлеринде малдап турар. Сарлык болгаш сарлыкчыларны алгап-йөрээр байырлалдың кол утказы – тайга-сыннарда малын малдап чоруур көдээ ишчилерниң социал байдалын экижидип, кичээнгейни салыры.

Сарлык – республикада эъткир уксаалыг мал бүдүрериниң база бир улуг курлавыры. Республикада сарлыктың баш саны өзүп турар. Экологтуг арыг эъттыг болгаш сүттүг сарлык сериин тайга-сыннарга тааржыр.

Кадыг-дошкун агаар-бойдустуг девискээрге мал малдаары амыр эвес ажыл-иш деп билир бис. Ынчангаш сарлыкчыларга социал магадылалды тургузары-биле тускай программаны ажылдап кылырының дугайының дугайында эртемденнер-даа, чон-даа саналды көдүрүп турар. Олче сарлыкчыларның социал камгаладылгазындан аңгыда, эрте пенсияже үнер эрге, хөй чыл ажылдааны дээш пенсия дээш оон-даа өске күрүне деткимчезин киирери көрдүнген.

Ажыы-биле чугаалаарга, чүгле сарлык малга хамаарыштыр тускайлаттынган күрүне программазы чок. Федералдыг деңнелде күрүне деткимчезин уксаалыг мал малдаан ажыл-агыйлар алыр эргелиг. Чижеглээн бир баш төрүүр сарлык бажынга онааштыр деткимчениң хемчээли – 3095 рубль. Тывада чеди уксаажыдалга ажыл-агыйы бар. Республика бюджединден уксаа чок төрүүр бир баш мал дээш, көдээ ишчилер чылда 1500 рубль деткимчени чаңгыс катап алыр. Маңаа хамаарыштыр айтырыгны шупту деңнелдерге көдүрери чугула. Федералдыг Хуралдың Федерация Чөвүлелиниң сенатору Дина Оюн сарлыкчыларны деткиир күрүне программазын ажылдап кылырын база кичээнгейге алган.

Чурукту Шончалай Ховалыг тырттырган