Сарыг-хөлчүлер чаа культура бажыңын тударынга белен

Өвүр кожууннуң чагырга даргазының хүлээлгезин күүседип турар Айдыс Куулар бо чылын Сарыг-Хөл сумузунга «Сорунза» төлевилели-биле чаа культура бажыңы туттунарын дыңнаткан.

– Амгы үеде оран-саваның таваан салыр талазы-биле ажылдар эгелээн.
Культура яамызындан сибит блоктар, эжиктер, соңгалар, 22 тонна цемент, хырба дээш оон-даа өске-даа тудуг материалдары келген.

«Сорунза» төлевилели-биле культура бажыңнары чоннуң күжү-биле туттунарын билир бис. Ынчангаш Ак-Чырааның көдээ культура одааның ажылдакчылары, сумунуң арга-дуржулгалыг тудугжулар аңаа ажылдаар. Культура яамызы оран-саваның ханазын тудуп үндүреринге тудугжуларны чорудар болган.

Сарыг-хөлчүлер дыка демниг чон, сумузунга чаа чараш культура одаан тудуп алырынга олар белен. Тудуг ажылдарынче чоокку сумулардан чаңгыс чер-чурттугларывысты эвилелдеп, бистиң талавыстан база дузаны кадар бис. Кандыг-даа тудугга күш херек болгай.

Культура яамызының төлээлери Сарыг-Хөлге кээп чораан. Олар бо хүнде кандыг ажылдар чоруттунуп турарын хынап, культура одааның директору Бежендей Донгак-биле ужурашкан. Тудугну эгезинден төнчүзүнге чедир хыналдага ап, кады сырый ажылдаарын дугурушканнар.

Эрткен чылдарда Саглы биле Солчур суурларның культура бажыңнарының үндезин септелгезин кылдынган, Дус-Даг биле Чаа-Суурда чаа культура бажыңнары туттунган.

Бо чылын Сарыг-Хөлге чаа культура одаан тудуптарга, кожуун төвү Хандагайтыда культура бажыңының үндезин септелгезин кылыры артып калыр.