Бөгүн Бай-Тайга кожууннуң Тээли суурда "Сарыг-Хаяның чажыды" деп чонар-даш уран чүүлүнүң фестивалының байырлыг ажыдыышкыны болганын чагырга чери дыңнаткан.
Бо чылын байырлал Тывада чонар-даш уран чүүлүнүң үндезилекчилериниң бирээзи Норбу Салчактың 125 харлаанынга тураскаадып эрттирип турар. Көп-Сөөктүң эң бир дугаар даш чонукчузу, ССРЭ-ниң Чурукчулар эвилелиниң баштайгы кежигүнү, ус-шевер Норбу Чашпайевичиниң чонар-даштан кылган ажылдарының делгелгези ажыттынган. Ооң салгалдары база ховар шевер кижилер болган.
Сентябрьның 19-тан 21-ге чедир Бай-Тайга кожуунга болуп эртер "Сарыг-Хаяның чажыды" фестиваль чогаадыкчы ужуражылгаларның, делгелгелерниң болгаш мастер-класстарның шөлү апаар. Фестивальга чонар-дашчыларның боттарының киржилгезинче онза кичээнгейни углап, оларның чогаадыкчы ажылдары канчаар оюп-сиилбиттингенин көөр арга тургустунар. Бо чылын чонар-даш чазаарын сонуургап, кылып чоруур школачылар мөөрейге бир дугаар киржир.
Фестивальды Бай-Тайга кожууннуң чагыргазы, Тываның чонар-даш мастерлериниң эвилели организастап эрттирип турар. Чонар-даш уран чүүлү тыва культураның чарылбас кезээ апарып, тыва ус-шеверлерниң ажылдары Россияның болгаш бүгү делегейниң ат-сураглыг музейлеринде делгеттинген.