Сарыг-Септе уруглар сады чаартынар

Тываның Баштыңы Владислав Ховалыг Каа-Хем кожууннуң национал төлевилелдер болгаш федералдыг программалар езугаар туттунуп турар социал объектилерни хынаан. Ук кожуунда өөредилге албан черлериниң үндезин септелгезиниң дугайында Тываның өөредилге сайыды Елена Хардикова тодаргай таныштырганын яамы дыңнаткан.

– «Көдээ девискээрлерниң комплекстиг хөгжүлдези» күрүне программа езугаар Сарыг-Сеп суурда «Родничок» уруглар садының үндезин септелгези бо чылдың март айда эгелээн. Төлевилел-дөзевилел документилериниң аайы-биле ажылдың 70 хуузу күүсеттинген.
Тываның Баштыңы Владислав Ховалыг уруглар садында септелгениң ажыл-чорудулгазын хынап көрген. Ук кожуунда РФ-тиң Көдээ ажыл-агый яамызының программазы езугаар чаартынып турар ийиги өөредилге инфратургузуунуң объектизи болур. Регионалдыг оператор кылдыр Тываның Экономика яамызы кирип турар.

Хүлээникчи объектини күзүн долузу-биле дужаар. Чаштар чаартынган уруглар садынче кирерлер. Уругларны чаа дыштанылга девискээрлери, чырык, чараш бөлүктер, чаа оруннар, столдар, сандайлар база ойнаарактар манаар. Уруглар садының удуртулгазы-биле оран-саваның иштики-даштыкы девискээрлерин чаагайжыдар дугайында айтырыгны чугаалаштывыс.

Көдээ суурларның объектилери ук программаже «кирер» азы «кирбези» муниципалдыг чагырга черлериниң идепкейлиг болгаш сонуургалдыг болурундан кол хамааржырын ооң мурнунда база демдеглээн мен. Амгы үеде Эрзин, Каа-Хем, Улуг-Хем кожууннарның өөредилге объектилерин программаже кииргени өөрүнчүг – деп, сайыт Елена Хардикова демдеглээн.

Бо хүннерде «Родничок» уруглар садының чылыдылга болгаш суг хандырар системазын долузу-биле чаартып, үндезин септелгениң ажылдарын доозуп турар. Ооң девискээрин база чаагайжыдар. Уруглар садынга чаа дериг-херекселди болгаш эт-септи салырын сагындыраал. Бүгү ажылдарже болгаш эт-сеп, дериг-херекселдерже федералдыг бюджеттен 120 сая хире рубльди аңгылаар.