«Саяннар» ансамблиниң чогаадыкчы өнчү-салгалы

Тываның профессионал танцы уран чүүлүнүң алдын шыгжамырын тургускан алдарлыг “Саяннар” ансамблиниң кол хореографтыг көргүзүглеринге тураскааткан “Салгалдарга тураскаал” деп элээн каш дамчыдылгалыг төлевилелдиң көргүзүү «Оваа ТВ» телеканалга эгелээр.

Ансамбльдиң хоочуннар төвү хамааты ниитилел хөгжүдеринге эрткен чылын Тываның Баштыңындан ойнап алган грантызы-биле төлевилелди боттандырган.

Төлевилелдиң автору болгаш удуртукчузу – “Саяннар” ансамблиниң директору чораан хоочун, Тываның алдарлыг артизи Светлана Сурун, Тываның алдарлыг артизи Татьяна Ондар. Тываның культуразының алдарлыг ажылдакчызы Елена Ондар дамчыдылганы башкарып эрттирер. Мария Наксыл биле Светлана Сурун сценарийин тургускан. Бирги тыва продакшн-компанияның «Ovaa media» чогаадыкчы командазы төлевилелди тырттырып, пост-продакшнны кылган.

“Салгалдарга тураскаал” бөлүк дамчыдылгада “Саяннар” ансамблиниң чеди танцызы кирген: «Ээлдек шыңгырааш», «Дамбыралар», «Баят сам», «Хам», «Иви», «Цам мистериязы», «Урянхайлар танцызы» база «Эзир-кара».

«Ovaa media» компанияның төлээзи Менди Наксылдың бодалы-биле алырга, Тываның культуразын болгаш ужур-чаңчылдарын камгалап-кадагалап база эрткен салгалдарның күш-ажылының дугайында сактыышкынны арттырынга чугула солун төлевилел тырттыртынган.
«Аныяк хореографтар, культурологтар, уран чүүл шинчилекчилери ансамбльдың ат-сураглыг танцылары канчаар тургунуп келгени-биле ол дамчыдылгалардан таныжар аргалыг.

Тырттырып тургаш, ооң төөгүзүн, күүседикчилерин дыңнап, билип алыры чүден солун болду. Интервьюлардан аңгыда, төлевилелдиң автору Светлана Суруннуң шыгжап чорууру ансамбльдың ховар дээн архив материалдарын дамчыдылгаларга көргүзер – деп, Менди Наксыл чугаалаан.

“Салгалдарга тураскаал” дамчыдылгалар четверг санында «Оваа ТВ» телеканалга 19.00 шакта: Рива ТВ база ТСИ кабельдиг четкилер 23 базыткыыжында дамчыдылгага база www.ovaa.ru сайтыга үнер. Дамчыдылга эрткен соонда элээн каш хонук эрте бергенде, үнүп каапкан дамчыдылгаларны сайтыдан көрүп болур.