ТР-ниң Өөредилге яамызынга этиканың болгаш культураның өөредилгеге үнелиг чүүлдерин ниити болгаш немелде өөредилге системазынче канчаар чедимчелиг киирериниң дугайында семинар болуп эрткенин Национал школа хөгжүдер институт дыңнаткан. Аңаа башкылар, эртемденнер, психологтар киржип, өөредилгени дыңнааннар.
Семинарны өөредилге сайыдының оралакчызы Надежда Цыганенко ажыткан. «Кижилер делегейи» деп программаны Шажын өөредилгезиниң Өөредилге төвүнүң директорунуң оралакчызы Айлана Балган таныштырып, өзүп орар салгалдың сагыш-сеткил болгаш мөзү-шынар сайзыралынга база уругларның этнокультурлуг бот-тускайлаңын быжыглаарынга программаның салдарының дугайында илеткээн.
Ук программа социал, сеткил-сагыш хайныышкынныг болгаш этиктиг кижизидилге деп үш угланыышкынныг. Ооң кол сорулгазы – кижиниң өске улус-биле эп-найыралдыг болуп, бодунуң болгаш өске улустуң сагыш-сеткилин билип шыдаар, кээргээчел болгаш долгандыр турар кижилер-биле бүзүрелдиг харылзааларны тургузарынга өөредири.
Семинарга Национал школа хөгжүдер институттуң методистери Снежана Ондар биле Регина Монгуш киришкен.