Серенмаа Хомушкуга "Культураның тергиини" деп хөрек демдээн тывыскан

Тываның Алдан-Маадыр аттыг Национал музейиниң төөгү болгаш чурт шинчилел салбырының Кунгуртуг сумузунда эргелекчизи, кадагалакчызы, медээлекчизи Серенмаа Хомушкуга ТР-ниң Культура яамызының "Культураның тергиини" деп хөрек демдээн сайыт Виктор Чигжит тывыскан.

Серенмаа Хомушку – Тыва Республиканың алдарлыг ажылдакчызы, күш-ажылдың хоочуну, херээженнер шимчээшкининиң идепкейжизи болгаш хөй-ниитижизи.

Серенмаа Шулууевна өөнүң ээзи, тус черниң школазынга төөгү башкызы болуп ажылдап чораан Бяяс Хомушку-биле төрээн чериниң шупту девискээрин эргий кезип, кады шинчилеп, төөгүнүң тураскаалдыг черлерин картага болгаш чурук материалдарынга демдеглевишаан, турисчи походтар кокпаларын тургузкан. Оларның ачызында Кунгуртугда музейде тере-хөлчүлерниң төөгүзү база культуразының дугайында үнелиг материалдар чыгдынган. Ол ышкаш аңгы-аңгы үе-шагның археологтуг солун тывыштары база ында шыгжаттынган.