Улуг-Хемниң хүндүлүг чурттакчылары Сергей биле Раиса Санчылар кожууннуң быжыг өг-бүлелериниң бирээзи. Олар өг-бүле тудуп, кады эгин кожа чурттанындан бээр чартык чүс чыл четкенин чагырга чери дыңнаткан.
Тываның хамааты байдалдың актылар бижидилгезиниң Улуг-Хем кожуунда эргелели өг-бүлеге «алдын кудазын» херечилеп бадыткаан байырлыг хемчегни эрттирген. Санчыларга Улуг-Хем кожууннуң, Торгалыг суму чагырга черлери болгаш ажы-төлү, чоок кижилери байырын чедирип, боодал чечектерни болгаш суй белектерни сөңнээн.
Сергей Туматович – Тыва Республиканың алдарлыг чылгычызы база малчыны, күш-ажылдың хоочуну. Раиса Сымчан-ооловна кадык камгалал шугумунга хөй чылдарда бараан болуп, шылгараңгай ажылдап чораан. Санчылар Улуг-Хем кожууннуң үлегерлиг, төлептиг өг-бүлелерниң бирээзи.
Сергей биле Раиса Санчылар төрээн сууру – Торгалыгга өг-бүле тудуп чурттааш, чартык чүс чылдың дургузунда эрес-шудургу ажыл-ижи болгаш амыдыралга кызымаккай чоруу-биле чонунуң хүндүткелин чаалап ап чоруурлар.
Санчыларның өг-бүлези беш ажы-төлдүң ынак ада-иези. «Хол изин бут чандыр баспас» дээри ышкаш, уруглары дээди эртемни чедип ап, өг-бүле тудуп, Тываның төлептиг ишчилери болуп аңгы-аңгы адырларда эки ажылдап чоруурлар.
Сергей Туматович кара чажындан хандыкшылы – чылгы малды азырап-өстүрерин ам-даа салбайн чоруур. Чылгычының «Россия-Калдар» деп шолалыг аъды республика наадымнарынга чеди катап эрткеш, төөгүже кирген.