Сүт-Хөл кожууннуң Өлең ховузунга тускай шериг операциязының киржикчизи Артыш-оол Монгуштуң чырык адынга тураскааткан республика чергелиг аът чарыжының маргылдаазы болуп эрткенин чагырга чери дыңнаткан.
Сержант Артыш-оол Монгуш 2023 чылдың март айда тускай шериг операциязынче, чуртун камгалаар дээш, эки турачылап чорупкан. Дөрт ажы-төлдүң ачазы 2024 чылдың ноябрь айда Донецк Улус Республиканың Селидово хоорайны хостаар тулчуушкунга дайынчы даалгазын күүседип тургаш, маадырлыы-биле амы-тынындан чарылган. Маадырга Эрес-дидим чоруктуң орденин мөчээниниң соонда тывыскан.
Өлең ховузунга чүс ажыг аътты үш аңгы салыгга чарыштырган. Спортчу хемчегге республиканың аңгы-аңгы булуңнарындан аът спортунуң мөгейикчилери хөйү-биле чыылган.
Аът чарыжын маадырның өөнүң ишти Чинчи Монгуш ажы-төлү, дөргүл- төрели болгаш чаңгыс классчы эштери-биле демнежип эрттирген. Кожууннуң удуртулгазы оларга спортчу хемчегни бедик деңнелге эрттиргени дээш четтиргенин илереткен. Маадырга мөңге алдар!
