Тываның Чогаалчылар эвилелиниң кежигүнү, филология эртемнериниң кандидады, Тываның күрүне университединиң даштыкы дылдар кафедразының доцентизи Тайгана Назынчап-Очурнуң «Сеткилимниң дээжизин сөңнексээр мен» деп юбилейлиг чогаадыкчы кежээзи Тээлиниң культура бажыңынга болуп эрткен.
Тайгана Назынчап-Очурнуң допчу намдарынга, чогаадыкчы ажыл-чорудулгазынга илеткелди дээди категорияның тыва дыл, чогаал башкызы, шүлүкчү, «Мешкен-Хөлдүң үннери» аттыг литературлуг музейниң эргелекчизи Сайлыкмаа Доос кылган.
Ужуражылганың аалчылары Россияның Чогаалчылар эвилелиниң кежигүнү, Тываның Улустуң чогаалчызы Кара-Күске Күнзекович Чооду, делегей чергелиг хөгжүм мөөрейлериниң лауреады, Тываның күрүне филармониязының симфониктиг оркестринде бирги гобоист хөгжүмчүзү, «Khoomeibeat» этно-поп-рок бөлүктүң киржикчизи, Тайгана Назынчап-Очурнуң кады төрээн дуңмазы Шораан Очур, «Бай-Тайга кожууннуң алдарлыг ыраажызы» аттың эдилекчизи, «Угулза» ансамблиниң солизи Анжела Монгуш база Тываның Чогаалчылар эвилелиниң кежигүннери, культура ажылдакчылары, ыраажылар, хөгжүмчүлер ук хемчегге киришкеннер.
Тываның Улустуң чогаалчызы Кара-Күске Чоодунуң, Тайгана Назынчап-Очурнуң чогаал болгаш эртем ажылын көргүскен ном делгелгелери чоннуң кичээнгейин хаара туткан.
Ыры-хөгжүмнүг кезекке Тайгана Очурнуң бижээн шүлүктерин ясли-садтың уругларындан эгелээш школачыларга чедир аянныг номчааннар. Харын-даа ыры болуп үнген ырыларын чаштар ырлап күүсеткеннер. Шүлүктер болгаш чуруктар мөөрейлериниң тиилекчилеринге чогаалчы боду шаңнал-макталын тывыскан.
Улуг хемчегни Бай-Тайга кожууннуң төпчүттүнген библиотека системазының чурт-шинчилел килдизиниң эргелекчизи Анай-Хаак Маадыр билдилиг удуртуп эрттирген.
