Шүлүктүң тургузуунуң дугайында кичээлдерни эрттирген

"Мажалык" чечен чогаал каттыжыышкынының ээлчеглиг чыыш хуралы болуп эрткен.

Хуралды Кызыл-Мажалыктың 1 дугаары школазының тыва дыл башкызы, каттыжыышкынның кежигүнү Ай-Суу Хертек ажыдып, шүлүктүң тургузуунуң дугайында кичээлдерни эрттирген. Ажыктыг кичээлдерге олуржуп келген кежигүннер, кыдырааштарынче дүжүрүп бижип ап турганнар.

Ай-Суу Хертек ТР-ның улустуң чогаалчыларының амыдыралы болгаш чогаадыкчы допчу-намдарын база сонуургаткан. Солун кичээлдерниң соонда хурал чыыштың база бир кол айтырыы, каттыжыышкынның удавас үнер номунуң дугайында чугаалашкан. Номче чаа кежигүннерниң шүлүктерин киирерин саналдааннар.

Хуралды түңнеп тура, чайгы дыштанылга үезинде кылыр ажылдарны база дугурушкан. Каттыжыышкынның удуртукчузу, ТР-ниң Чогаалчылар эвилелиниң кежигүнү Орлан Кара-Сал идекпейлиг кежигүннерни демдеглеп, суй белектер болгаш номнар-биле шаңнаан.