Тыва дыл хүнүнге уткуштур «Үш үне» деп этнокультурлуг диктантыны Национал школа хөгжүдер институт 33 айтырыглыг тест хевиринге эрттирген.
Диктантының ниити киржикчилерниң саны 7119 кижи болган. Эң улуг назылыг киржикчи 88, эң бичии киржикчи – 11 харлыг.
Киржикчилерниң географиязы делгем: Тываның бүгү кожуун, хоорайларындан эгелээш Ямал-Ненец автономнуг округ, Черногорск, Санкт-Петербург, Сахалинск, Салехард, Подольск, Камчаткада Петропавловск, Сахалинск, Новосибирск, Иннополис, Североенисейск, Екатеринбург, Благовещенск, Магадан чедир чурттап чоруур чуртташтарывыс киришкен.
Бир айтырыгга шын харыы дээш үш сан алыр, а сөөлгү, 33 дугаар айтырыгга шын харыылаза дөрт сан алыр турган. Ниитизи-биле шупту айтырыгларга шын харыылаан киржикчи 100 санны алыр аргалыг турган. 10-30 баллга харыылаан киржикчилер – 526, 30-50 баллга 2550, 50-70 баллга 2408, 70-80 баллга 1278, 90-100 баллга 212 киржикчи кылган.
Бедик санга харыылаан киржикчилерниң аразындан эң хөй – 100 санны тос кижи алган.
- Болат Куулар – 55-ки гвардейжи тускай мото-адыгжы (даг) бригада;
- Шеңне Куулар – ТывКУ-нуң 3 дугаар курузунуң сургуулу;
- Саяна Моңгуш – «Теремок» уруглар сады, Ак-Довурак хоорай;
- Данчыыр Моңгуш – Ак-Довурактың даг-үлетпүр техникуму;
- Эрес Содунам – чолаачы, Ак-Довурак хоорай;
- Энерел Содунам – Ак-Довурактың «Өлчей» лицейиниң өөреникчизи;
- Лайжит Содунам – Ак-Довурактың «Өлчей» лицейиниң өөреникчизи;
- Яна Моңгуш – «Теремок» уруглар сады, Ак-Довурак хоорай.
Диктантының шын харыыларын дараазында айтыгже киргеш, билип ап болур irnsh.ru/wp-content...
Национал школа хөгжүдер институт этнокультурлуг диктантының сорулгалары чедип алдынганын дыңнадып, тыва дыл, чер, чон дугайында айтырыгларга киржикчилерниң сонуургалы улуг, билииниң деңнели бедик деп үнелээн.