Өөредилге-кижизидилгелиг шимчээшкин «Үш үне» деп онлайн-викторина хевиринге бөгүн 16.00 шакта (Москва шагы-биле 12:00) болуп эртерин Национал школа хөгжүдер институт дыңнаткан.
Викторинага киржиринче айтылга Национал школа хөгжүдер институттуң сайтызынга www.irnsh.ru база «Вконтакте» социал четкиде арынынга https://vk.com/irnsh октябрь 28-тиң хүнүнде 5 минут бурунгаар салдынар.
Темазы: үш үне – төрээн дыл, төрээн чер, төрел чон.
Викторинаны күүседириниң харыысалгазын Тыва Республиканың бүгү албан черлериниң, кожууннарының, сумуларының удуртукчулары хүлээнир болгаш боттарының ажылчын бөлүктерин тургузар.
Викторинаның сорулгазы: төрээн дылын хумагалап, төрээн республиказының төөгүзүн, культуразын, чоннуң ажыл-амыдыралын өөрениринге сонуургалды күштелдирери; тыва дыл, чогаал, төөгү талазы-биле билииниң деңнелин тодарадыры.
Викторинаның киржикчилери
Тыва Республикада болгаш Тывадан дашкаар чурттап чоруур тыва дылды билир, аңаа сонуургалдыг хамаатылар ук шимчээшкинниң киржикчилери болур эргелиг. Хар-назынын, билииниң деңнелин, чүдүлге-сүзүглелин, ниитилелде туружун чугулалап көрбейн турар. Викторинаны бижиири халас, хамааты кижи бодунуң эки туразы-биле киржир эргелиг.
Викторинаны эрттирип болурунуң немелде аргалары
Викторина Интернет четкизинге эртер болза-даа, ону республиканың өөредилге албан черлеринге, культура албан черлеринге Интернетте коштунган компьютерлер-биле дериттинген таарымчалыг өрээлдерге организастап болур.
Тыва Республиканың албан черлери, кожууннарның болгаш Ак-Довурак, Кызыл хоорайларның администрациялары викторинаны Интернет четкизинге бижиир таарымчалыг байдалдарны чонга тургузуп бээри күзенчиг.
Викторинаның тургузуу
Викторина 4 кезектен тургустунган. Кезек бүрүзү 6-6 айтырыглыг, ниитизи-биле 24 айтырыг бар. Ниити баллы – 100.
Викторинаны тыва дылга харыылаар, харыылар тест хевирлиг болгаш боду бижиир онаалгалардан тургустунган.
Викторинаның сөзүглели чаңгыс вариантылыг.
Онаалгаларны күүседир бетинде даалгаларны кичээнгейлиг номчууру чугула. Айтырыгларны дес-дараалаштыр харыылаар, ажа халып азы дедир эглип кээри болдунмас.
Викторинаны күүседириниң үези – 60 минута.
Сөөлгү айтырыгга харыылаан соонда, түңнел балл экранга үнүп кээр.
Түңнел чүүлдер
Викторинаны 100 баллга харыылаан тиилекчилер баллын болгаш ажылды кылган шак, минутазын чурукка тырттыргаш (скриншот), НШХИ-ниң электроннуг почтазынче (irnsh_tuva@mail.ru) чорудар. Тиилекчилерге ТР-ниң өөредилге яамызының Мактал бижиин тыпсыр.
Викторинаның түңнелдериниң дугайында медээ НШХИ-ниң сайтызынга www.irnsh.ru база «Вконтакте» социал четкиде арынынга чырыттынар.
Викторина бижидериниң дүрүмүн Национал школа хөгжүдер институт ажылдап кылган.
