Барыын-Хемчик кожууннуң сумуларының аразынга "Шагаа Кадыны-2026", "Шагаа Нояны-2026" деп мөөрей болуп эрткенин Аксы-Барлыктың Күжүгет Херел аттыг культура бажыңы дыңнаткан.
Кожуун чергелиг бир дугаар эрткен мөөрейге ортумак назылыг улус киришкен. Аксы-Барлык суурну Буян Сержи биле Шораана Моктээр төлээлээн. Мөөрейжилер боттарын онза-тускай таныштырып, уран салым-чаяанын, төрээн дылын, езу-чаңчылдарын эки билирин көргүскеш, "Шагаа Нояны-2026", "Ай херелдиг мөңгүн кадын-2026" деп аттарга толептиг болганнар.
"Шагаа Нояны-2026" аттың эдилекчизи бедик үнелелди ап, өг-бүлениң ээзи болур адалар аразынга "Ада мен" деп республика чергелиг мөөрейге киржир эргени чаалап алган.
Аксы-барлыкчылар Буян Сержиге республика чергелиг мөөрейге чедиишкинниг киржирин кузээн.
