Шагаан-Арыг хоорайда «Онза-чуур»

Улуг-Хем кожууннуң төвү Шагаан-Арыг хоорайдан ийи ажы-төлдуг Ай-кыс биле Камгалакчы Монгуштар «Онза-чуур» деп хеп чуур черни социал керээге үндезилээн күрүне деткимчези-биле ажыдып алган.

Мооң мурнунда хоорайга хеп чуур чер чок турган. Чаа ажыттынган биче бүдүрүлге шагаан-арыгжыларның хереглелин хандырган. Хеп чугдурар улустарның саны эвээш эвес.

Эгелеп чоруур сайгарлыкчы күрүне деткимчези-биле хеп чуур машиналар, стол, шкаф дээн оон-даа өске херекселдерни садып алган.

Монгуштар оран-саваны боттарының күжү-биле тудуп алганнар. Өгнүң эр ээзиниң чугаазы-биле алырга, тудугнуң эң чарыгдалдыг кезээ – суг төгер черни кылыры, хоорзаларны кожары.

Социал деткимче алыкчылары ажыл-агыйы чай чок, орайга дээр ажылдаар чаңгыс чер чурттугларынга таарымчалыг байдалдарны тургузуп, хепти бажыңнарындан алгаш, дедир чедирип бээр арганы база тургускан. Ол ышкаш акцияларны чарлап турар.

Кызымаккай аныяк өг-бүле ажыл-херээн улаштыр сайзырадырын күзеп турарлар.

Дамырак Монгуш, ТывКУ-нуң филология факультединиң студентизи

Чуруктары өг-бүле архивинден алган