Шагаан-Арыг хоорайда чаа котельнаяда тудуг ажылдары график езугаар чоруп турар.
Амгы үеде тудугнуң таваан кудар ажылдарны кылып турар. Ооң-биле чергелештир тудугжулар демир-бетон баганалар кудар демирлерни тургузуп эгелээн. Тудугнуң бүзүрелдии болгаш быжыы оон кол хамааржыр. Төлевилелде көрдүнгени езугаар тудугнуң өзээн тудуп, бетон холумактыг бүдүмелдиң шынарын хынап турар.
Шагаан-Арыгга чаа котельнаяны ажыглалче киириптерге, хоорайның чуртталга бажыңнары болгаш социал объектилери бүзүрелдиг чылыг-биле хандыртынар. ТР-ниң Энергетика болгаш чуртталга-коммунал ажыл-агый яамызызы тудуг ажылдары көрдүнген чурум езугаар чоруп турарын дыңнаткан.
«Амыдырал дээш инфратургузуг» национал төлевилелдиң «Коммуналдыг инфратургузугнуң чаартылгазы» федералдыг төлевилелиниң езугаар объектини тудуп турар. Тываның Чазаа төлевилелди боттандырары-биле РФ-тиң Тудуг болгаш чуртталга-коммунал ажыл-агый яамызы-биле федералдыг бюджеттен субсидия алыр дугуржулганы чарган.
Котельная тудуунуң төлевилел-санаашкын документациязын 2025 чылдың июль төнчүзүнге чедир долузу-биле ажылдап кылган. Ол-ла чылдың август төнчүзүнде төлевилел күрүнениң эксперт сайгарылгазындан чогумчалыг түңнелди алган.