Шагаан-Арыгда гимназияның септелгези доостур чадазында

Улуг-Хем кожууннуң төвү Шагаан-Арыг хоорайда гимназияның үндезин септелгези доостурунуң чадазында чоруттунуп турарын кожууннуң өөредилге эргелели дыңнаткан.

1980 чылда туттунган гимназияның септелгезин “Планета” кызыгаарлаан харыысалгалыг ниитилел чорудуп турар. Өөредилге черинде өрээлдерни чугайлап, линолеумнарны чадып дооскан, плинтустар салып турар. Ол ышкаш сантехниктиг ажылдар кылыры, чадаларның шалазын, ханазын будууру арткан.

Чаа өөредилге чылынга чедир ам-даа 1 ай чартык үе бар. Тудуг организациязы август айда үндезин септелгени доозуптарынга бүзүрелдиг.
Сентябрь 1-де школачылар чаарткан оран-савага эң-не дээре байдалдарга чаа билиглерни шиңгээдип кириптерлер. Гимназия бүрүнү-биле чаагайжыды эде кылдынган болурундан аңгыда, чаа эт-сеп болгаш дериг-херекселдер-биле четчелеттинер.