«Көдээ суурларның комплекстиг хөгжүлдези» күрүне программазы-биле Улуг-Хем кожуунда элээн каш социал объектилерни тудуп, чаарткан. 2025 чылда Чодураа суурда 176 өөреникчиге школаны туткан, 1 дугаар школада үндезин септелгени чоруткан, Шагаан-Арыг хоорайның Малчын кудумчузунда суг шугумун тудуп дооскан.
Улуг-Хем кожууннуң чагырга даргазы Эрес Мандан-оол Шагаан-Арыгда 150 олуттуг уругларның уран чүүл школазында (2025 чылдан шилчээн объект) эде чаартылга ажылдарын хынап көргенин дыңнаткан.
Чагырга даргазы тудугжу Арсен Кимович-биле ужуражып, таваржып турар нарын айтырыгларын чугаалашкан. Ол тудуг объектизиниң белени 70 хире хуу дээрзин дыңнаткан. Амгы үеде тудугда 18 кижи ажылдап турар.
Тудуг ажылдарын хуусаазында доозарда, ажылчыннарның санын көвүдедип, материалдарны үе шаанда чедирерин хандырары чугулазын хыналда көргүскен. Чагырга даргазы тудугнуң үе-чадазының күүселдезиниң шынарын хыналдада алган.