Тываның тудуг техникумунуң салбырында Worldskills стандарттарының «Каңнаашкын технологиялары» деп мастерскаязы ажытканын регионнуң Өөредилге яамызы дыңнаткан.
Мастерскаяның ажыдыышкыны сургуулдарның бедик мергежилдиглер болурунга дузалаар практиктиг белеткелиниң деңнелин мурнакчы технологиялар болгаш амгы үениң стандарттарынга дүүштүр бедидери болур.
Өөредилге сайыдының оралакчызының хүлээлгезин күүседип турар Владимир Монгушка кызыл кожааны кезер хүндүлүг эргени берген.
– Чаа мастерская сургуул бүрүзүнге амгы болгаш келир үеде шилип алган мергежилдериниң тускай эртемин шиңгээдип алырынга аргаларын улгаттырар. Байырлыг ажыдыышкынның шупту киржикчилеринге чедиишкиннерни, техникумнуң башкы коллективинге үре-түңнелдиг ажыл-чорудулганы база чечектелиишкинни күзедим! – деп, Владимир Монгуш демдеглээн.
Бо чылын “Өөредилге” национал төлевилелдиң “Аныяк профессоналдар” федералдыг төлевилелиниң чорудуу-биле республикада бо он бир дугаар ажыттынып турар мастерская дээрзин сагындыраалыңар. Ниитизи-биле шак мындыг шөлчүгештер үш ортумак профессионал өөредилге албан чериниң баазазында тургустунган.
