Шагааның часпас адыгжызы – Олег Чанчып

Улуг-Хем кожууннуң Ийи-Тал сумузунга Шагаа байырлалында тыва ча адар оюннуң баг адар хевиринге мөөрей болуп эрткенин чагырга чери дыңнаткан.

Ча адар оюнга 40 адыгжы киришкен. Чоокта чаа Моол күрүнениң Улан-Баторга ча адарынга спорт мастер атты күүсеткен Олег Чанчып тиилээн. Ийиги-үшкү черлерни Чөөн-Хемчиктен Альберт Сарыглар база Сылдыс Монгуш чаалап алганнар.

Бо удаада ийи-талчылар ча оюнун сеске чедир шаңнаан. Дөрт-беш дугаар черлерге Чаа-Хөлден Аяс Монгуш биле Эйлиг-Хемден Амир Оспакай, алды, чеди, сес дугаар черлерге Барыын-Хемчиктен Артыш Монгуш, Артыш Мортуй-оол (Кызыл), Маны Кызыл (Сүт-Хөл) олар төлептиг болган.