Бии-Хем кожууннуң «Энерелдиг сеткилдиң оруу» ачы-дуза фондузу кожуунда тускай шериг операциязының киржикчилерниң өг-бүлелерин деткиир «Ромашка» төвү ажылын уламчылап турар.
Чогаадылга “терапиязын” Туранның 2 дугаар школазының технология башкызы Салбак Хелин-оол эрттирген. Мастер-класс үезинде шай, дус болгаш артыш хаптарын даараан. Ук школаның директору Саяна Аракчаа даараныр машиналарны аңгылап берген.
Мастер-класстың киржикчилеринге даараныр материалдарны тускайлаан, олар быжып, даарап өөренген. Тускай шериг операциязында киржип турар база долу эвес мөөңнээшкин-биле шериг албан-хүлээлгезинче кыйгырткан дайынчыларның өг-бүлелериниң кыс ээлери, авалары болгаш чоок кижилери үезин ажыктыг эрттирип, даарап алган хаптары-биле чанганнар.
«Ромашка» төвүнүң кежигүннери өг-бүлелерге арга-сүмезин кадып, психологтуг дузаны чедирип турар. Төп кожууннуң сумуларынга чедип, аңгы-аңгы хемчеглерни эрттирер.
Тываның Баштыңының грантызының деткимчези-биле ук төлевилелди боттандырып турарын сагындыраал.
