Шериг-инженер институдунче бежен олутту аңгылаан

Субудай Донгак – Сибирь федералдыг округтуң Шериг-инженер институдунуң бешки курузунуң студентизи. Ол Красноярск хоорайның студент чаңгыс чер-чурттугларының президентизи болгаш идепкейжизи. Субудай Кызылдың школа болгаш техникумнарының доозукчуларынга шериг мергежилдиң ат-алдарының база ооң чугула херегиниң дугайында чугаалап бергенин ТР-ниң Өөредилге яамызы дыңнаткан.

Институттуң удуртулгазы Субудайны өөредилгеде эки көргүзүглери дээш, РФ-тиң Чепсектиг күштерде офицер албан-дужаалды делгередир сорулга-биле, бодунуң республиказында школа болгаш ортумак профессионал өөредилге албан черлериниң доозукчуларынга профугланыышкынныг ужуражылгалар эрттирери-биле саналдаан.

Келир үениң офицери Кызылдың 2 болгаш 16 дугаар лицейниң, Тываның кадет корпузунуң келир үеде абитуриентилери, ол ышкаш Тываның политехниктиг техникумунуң сургуулдары-биле чугааны чоруткан. Ужуражылгага Ада-чуртунга бодунуң чуртталгазын бараалгадырын шиитпирлээн оолдар келген. Аалчы келген оолдарга чүгле шериг дээди өөредилге албан черинге өөренири колдап турар эвес, харын-даа шилип алган мергежилинге бодунуң арга-шинээн база чаяанын үнелеп билири херек дээрзин чугаалаан. Ол ышкаш Субудай өске школаларга база ужуражылгаларны эрттирген.

– Шериг институдунга өөренири – аныяк оолдар болгаш уругларга төлептиг эртем болгаш офицер дужаал чедип алыр арга-дыр. Мээң чаңгыс чер-чурттугларым дээди шериг эртемни чедип алыр дээн хүлээлгени уламчылаарын күзээр-дир мен. Ада-чуртка бараан болуру – алдар-хүндү» – деп, Субудай Донгак демдеглээн.

Бо чылын Тывага Сибирь федералдыг округтуң Шериг-инженер институдунче 50 олутту аңгылаан.