ТР-ниң Дээди Судунга 2025 чылда республиканың судтарының ажыл-чорудулгазын түңнээн хуралга “Тываның эң дээре суду”, “Тываның эң дээре эптештирилге шииткекчизиниң суд участогу” мөөрейниң тиилекчилерин шаңнап-мактаанын шүүгү чери дыңнаткан.
Комиссия район судтарының ажылының 13, эптештирилге судтарының 11 көргүзүүн үнелеп көрген. Тываның Шииткекчилер чөвүлелиниң даргазы Э.В. Орешков шылгарааннарны шаңнаан.
Тываның эң дээре эптештирилге шииткекчизиниң суд участогу – Кызыл кожууннуң 2 дугаар суд участогу (эптештирилге шииткекчизи С.Я. Дажы-Сегбе). Кызылдың 6 дугаар суд участогу (эптештирилге шииткекчизи С.О. Куулар) ийиги черде.
Хөй составтыг судтар аразынга Улуг-Хемниң район суду (даргазы С.Н. Жибинов) бирги, Кызылдың хоорай суду (даргазы О.Б. Дондупай) ийиги черни алган.
Эвээш составтыг судтар аразынга бирги черни Сүт-Хөлдүң район суду (даргазы А.О. Салчак), ийиги черни Таңдының район суду (даргазы А.А. Ондар) чаалап алган.
Тываның Шииткекчилер чөвүлели 2025 чылда “Суд хуралының эң дээре секретары” профессионал мергежил мөөрейин эрттирген. Чеди кижи составтыг комиссия кежигүннери киржикчилерни элээш каш негелде езугаар үнелеп көрген. Олар тестээшкинни эртип, практиктиг болгаш оон-даа өске даалгаларны күүсеткен.
Кызылдың район судунуң секретары У.А. Сарыглар бирги черни бүзүрелдии-биле чаалап алган. Амгы үеде ол ТР-ниң Дээди Судунда ажылдап турар.
