Школачылар тускай шериг операциязының девискээринче чорудар оңгу лааларын кылып эгелээн

Тываның школаларында тускай шериг операциязының киржикчилерин деткииринче угланган – «Оңгу лаазы» база «Дайынчыга чагаа» деп ийи ада-чуртчу акция эгелээн.

Ада-чурт камгалакчыларының хей-аъдын бедидер болгаш фронт биле хамааты ниитилелдиң аразында харылзааны быжыглаар дээн бо эгелээшкиннерни Кызылдың 1 дугаар школазының аныяк армейжилери база «Авангард» өөредилге-методиктиг төптүң кадеттери эгелээн.

Директорнуң өөредилге талазы-биле чөвүлекчизи болгаш дагдыныкчызы Наира Балянның удуртулгазы-биле школачылар шериг албан-хүлээлгезинче кыйгыртыр назы четкен аныяктарның белеткел лагериниң курсантылары-биле кады эрткен неделяда 500 хире лааны кылганнар. Лаа кылырда демир лааза, эргискен воск болгаш элээн кылын саазын херек. Бо лаалар элээн шак дургузунда хып, аңаа чем белеткеп алырынга чедер. Акцияның киржикчилери ооң-биле чергелештир, Ада-чурттуң камгалакчыларынга деткимче болгаш өөрүп четтириишкинниң чагааларын бижип турар.

«Бо акциялар бистиң дайынчыларывыстың хей-аъдын бедидеринге дузалаар болгаш кижи бүрүзүнүң ниити херекке үлүг-хуузу чугула дээрзин сагындырып турар. Аныяктарның патриотчу кижизидилгезинге ындыг хемчеглер чугула рольду ойнап, чурттуң салым-чолунга харыысалгалыг чорукту болгаш киржилгени хевирлээр» – деп, “Чалыы армия” хөй-ниити шимчээшкининиң регионалдыг штавының удуртукчузу [id738087530|Айдын Шивидек] демдеглээн.

2022 чылдан бээр Тываның школачыларының аразында «Оңгу лаазы», «Дайынчыга чагаа» деп ада-чуртчу акциялар эртип турарын сагындыраал. Школачыларның кылган лаалары база уругларның бижээн чагаалары дараазында ачы-дуза чүъгү-биле тускай шериг операциязының девискээринче чорудар. Бо чылын акциялар декабрь 15-ке чедир уламчылаар.

Тываның өөредилге черлериниң аныяк армейжилери болгаш школачылары 2022 чылдан бээр тускай шериг операциязының мурнуку одуругларынче 20 муң ажыг чагааны болгаш 7 муң ажыг оңгу лааларын чорутканын организакчылар дыңнаткан.