Кызылдың 9 дугаар гимназиязының «Элээди журналист» бөлгүмүнүң өөреникчилери «Тос-карак» деп школа солунунуң бир дугаар үндүрүлгезин 1999 чылдың ноябрь айда ТР-ниң Парлалга болгаш информация талазы-биле күрүне комитединиң типографиязынга парлаанын таныштырганын республиканың немелде өөредилге сайзырадыр төвү дыңнаткан.
«Солуннуң кол редактору, школага «Уран сөс» тускай курстуң удуртукчузу К-Э. К. Кудажы турган. Солуннуң тиражы – 500 кезек. Үндүрүкчүзү – Кызылдың 9 дугаар школа-гимназиязының дирекциязы.
«Тос-карак» солунда школаның ажыл-ижи-биле таныштырган. Школада аңгы-аңгы клубтарның, бөлгүмнерниң ажыл-чорудулгазын бижээн. Ол ышкаш өөреникчилерниң болгаш башкыларның чогааткан шүлүктерин парлаан.
Ооң соонда чылдарда «Вести гимназии», «Школьный вестник» деп аттарлыг солуннар үнүп турган» – деп, өөреникчилер тайылбырлаан.
Амгы үеде школаның немелде өөредилге төвүнде «Элээди журналист» бөлгүмү ажылдап турар. Ында ортаакы болгаш улуг класстарның өөреникчилери сонуургал-биле киржип турар. 5-7 класстарның өөреникчилери «Сылдысчыгаш» республиканың уруглар солуну-биле сырый харылзаалыг, бижээн чүүлдери солуннуң социал четкилеринде болгаш сайтызында, өңнүг-чараш «Сылдысчыгаш» солунда парлаттынгылаан. А улуг класстарның өөреникчилери – «Тываның аныяктары» солуннуң идепкейлиг номчукчулары болгаш бижикчилери. Оларның бижээн чагаалары база-ла солуннуң социал четкилерде арыннарында, сайтызында, амгы үениң чараш солунунда парлаттынып турар.
«Элээди журналист» бөлгүмүнүң оолдары болгаш уруглары солуннарның үндүрүлгезинде үлүг-хуузун киирип турар.