Барыын-Хемчик кожууннуң девискээринде «Шолбан-Ак» лагерьге ада-иелерге ажык эжиктер хүнүн эрттиргенин республиканың немелде өөредилге сайзырадыр төвү дыңнаткан.
Үжен алды ада-ие лагерьде уругларының дыштанып турар байдалын көөрү-биле чедип келген. Лагерьниң ажылдакчылары оларга уругларның чурттап турар өрээлдерин, чемненир черин, спортчу шөлдерни көргүскен.
Ол ышкаш ээлчегниң өөредиглиг болгаш оюн-тоглаа программаларын таныштырган. Ада-иелерниң сонуургаан айтырыгларынга долу харыыны берген.
«Ада-иелер-биле дорт харылзаа биске чугула херек. Өг-бүле бүрүзү уруг-дарыының дыштанылгазы, сайзыралы дээш сагыш човап турар. Ада-иелерниң чагыг-сүмези канчаар-даа аажок үнелиг» – деп, лагерьниң ажылдакчылары демдеглээн.
Уруглар ада-иези-биле солун хүннү эрттирген: спортчу оюннар, каткы-хөг үзүктелбээн.
